ខេត្តបន្ទាយមានជ័យ៖ប្រជាពលរដ្ឋដែលជាជនភៀសសឹកចំនួន២៥០០គ្រួសារ ប្រមាណជាងមួយម៉ឺននាក់ កំពុងស្នាក់នៅបណ្ដោះអាសន្ននាទីសុវត្ថិភាពក្នុងបរិវេណផ្សារបូរីជ័យ២ចម្ការតាដោក ក្នុងស្រុកមង្គលបូរី ខេត្តបន្ទាយមានជ័យ។ បើតាមការឲ្យដឹងពីលោក រ័ត្ន ដាស៊ីណង់ អភិបាលស្រុកមង្គលបូរី បានឲ្យដឹងថា បើគិតមកត្រឹមព្រឹកថ្ងៃទី១០ ខែធ្នូ ឆ្នាំ២០២៥ បងប្អូនប្រជាពលរដ្ឋ ជាជនភៀសសឹកសរុបចំនួន២៥០០គ្រួសារ ប្រមាណជាងមួយម៉ឺននាក់ ពួកគាត់បានភៀសខ្លួនពីភូមិឋាន ដែលរស់នៅតាមព្រំដែនកម្ពុជា-ថៃ គេចពីការឈ្លានពាន មកលើបូរណភាពទឹកដីដែលក្នុងនោះ ពួកចោរសៀមបានធ្វើការបាញ់កាំភ្លើងធំចូលមកទឹកដីកម្ពុជា បណ្ដាលឲ្យប្រជាពលរដ្ឋស្លាប់និងរងរបួសធ្ងន់ ស្រាលផងដែរ។
លោកអភិបាលស្រុកបានបន្តថា ដោយបងប្អូនប្រជាពលរដ្ឋ ដែលជាជនភៀសសឹក មានចំនួនច្រើនពេក បានធ្វើឲ្យការគ្រប់គ្រងរបស់រដ្ឋបាលស្រុក មានភាពលំបាកបន្តិច ក៏ប៉ុន្តែការរស់នៅហូបចុកពុំមានជាបញ្ហាអ្វីនោះទេ គឺអាជ្ញាធរ សប្បុរសជន ព្រមទាំងព្រះសង្ឃក៏បានធ្វើការផ្តល់នូវអំណោយសម្ភារៈ សម្រាប់ជួយសម្រាលជីវភាពដល់ពួកគាត់បានមួយកម្រិត។ ជាចុងក្រោយលោក រដ្ឋ ដាស៊ីដង់ ក៏បានធ្វើការអំពាវនាវដល់បងប្អូនប្រជាពលរដ្ឋទាំងអស់សូមចូលរួមថែរក្សាអនាម័យបរិស្ថានឲ្យបានល្អស្អាតគឺដើម្បីសុខភាពរបស់យើងទាំងអស់គ្នា៕
