(បន្ទាយមានជ័យ)៖ដើម្បីសុវត្ថិភាពបងប្អូនប្រជាពលរដ្ឋ នាល្ងាចថ្ងៃទី៨ ខែធ្នូ ឆ្នាំ២០២៥ អាជ្ញាធរក្រុងប៉ោយប៉ែត បានសម្រេចបិទផ្លូវផ្អាកការចេញចូលជាបណ្ដោះអាសន្នតាមបណ្ដោយព្រំដែនចាប់ពីរទំនប់ក ៥ រហូតមកដល់រង្វង់មូលច្រកទ្វារព្រំដែនអន្តរជាតិប៉ោយប៉ែត ស្ថិតនៅក្នុងសង្កាត់អូរជ្រៅ ក្រុងប៉ោយប៉ែត និងប្រកាសណែនាំឲ្យបងប្អូនប្រជាពលរដ្ឋមានការប្រុងប្រយ័ត្នខ្ពស់ ដោយត្រៀមនិងរកកន្លែងមានសុវត្ថិភាព ខណៈសៀមនូវតែបន្តបាញ់រាលដាលមកដល់បឹងត្រកួន ស្រុកថ្មពួក រហូតមកដល់ព្រៃចាន់ ជោគជ័យ ទ្រនប់ដាច់ ស្ថិតក្នុងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បណ្ដាលឱ្យខូចខាតទ្រព្យសម្បត្តិរបស់បងប្អូនប្រជាពលរដ្ឋ ហេដ្ឋារចនាសម្ព័ន្ធ(ផ្លូវ) សិស្សានុសិស្ស ប្រជាពលរដ្ឋភ័យស្លន់ស្លោរត់រកទីកន្លែងមានសុវត្ថិភាពនោះ។ ក្រោយពីអាជ្ញាធរប្រកាស ប្រជាពលរដ្ឋបាននាំគ្នាសម្រុកចាក់ប្រេង នៅតាមការ៉ាសនីមួយៗ ទម្រង់ជាជួរគ្នាយ៉ាងច្រើនខុសពីធម្មតាមានទាំងម៉ូតូនិងរថយន្តគ្រប់ប្រភេទ ។
សម្រាប់ទិដ្ឋភាពរួមនៅក្នុងក្រុងប៉ោយប៉ែត ប្រជាពលរដ្ឋនូវតែបន្តធ្វើសកម្មភាពប្រកបរបររកទទួលទានដដែល គិតមកដល់ម៉ោង ៧យប់ មានការភៀសខ្លួនចេញបន្តិចបន្តួចតែប៉ុណ្ណោះ អ្នកប្រកបរបរលក់ដូរនូវតែបន្តលក់ គ្រាន់តែមានការជួបជុំជជែកគ្នាខុសពីធម្មតានៅតាមផ្លូវនានា ពោលគឺរង់ចាំមើលគ្នាទៅវិញទៅមក ព្រោះពួកគាត់យល់ឃើញថា នៅក្នុងក្រុងប៉ោយប៉ែតជាក្រុងមួយដែលមានអាជីវករ អ្នករកស៊ីធំៗ និងភ្ញៀវទេសចរណ៍ទាំងជាតិ និងអន្តរជាតិច្រើន ក្នុងនោះក៏មានជនជាតិថៃខ្លួងឯងច្រើនផងដែរ ដូច្នេះហើយពួកគាត់សង្ឃឹថា មិនអាចធ្វើទៅរួចនោះទេ។
ដោយឡែកសម្រាប់បងប្អូនខ្មែរ ដែលប្រកបរបរលក់ដូរនៅក្នុងផ្សាររោងក្លឿទឹកដីសៀមឯនោះវិញ តាមប្រភពព័ត៌មានដែលភ្នាក់ងារយើងទទួលបានមកថា ទម្រួតសៀម បានប្រកាសឲ្យផ្អាកការលក់ដូរ ពោលគឺឲ្យបិទផ្សារទាំងមូល ហើយឱ្យចាក់ចេញទៅរកកន្លែងមានសុវត្ថិភាព នៅសួនកាញ់ចាណា ក្នុងស្រុកអារញ្ញ ខេត្តស្រះកែវ ក្នុងនោះបានដកទូរសព្ទមិនឱ្យប្រើប្រាស់ថែមទៀតផង។ ក្រោយមកទាហានសៀមបានយករថក្រោះមកដាក់ពង្រាយនៅតាមបន្ទាត់ព្រំដែនម្ដុំផ្សាររោងក្លឿ និងកម្លាំងប៉ូលីសជាច្រើននាក់ ធ្វើឲ្យពួកគាត់មានការព្រួយបារម្ភនិងភ័យស្លន់ស្លោ ខ្លះសម្ងំក្នុងតូបនិងខ្លះទៀតក៏ទៅតាមការប្រកាសរបស់ទម្រួតសៀម ៕
