(ភ្នំពេញ)៖ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល និងថ្នាក់ដឹកនាំក្រសួងសុខាភិបាល នាថ្ងៃទី១៧ ខែធ្នូ ឆ្នាំ២០២៥ បានបន្តអញ្ជើញចុះសួរសុខទុក្ខវីរកងទ័ព ដែលកំពុងសម្រាកព្យាបាលជំងឺ នៅមន្ទីរពេទ្យមិត្តភាពខ្មែរ–សូវៀត។
ឯកឧត្តមសាស្រ្តាចារ្យរដ្ឋមន្រ្តី បានដឹកនាំការប្រជុំតាមដានវឌ្ឍនភាពនៃការថែទាំព្យាបាល ដោយក្រុមគ្រូពេទ្យឯកទេសពហុជំនាញមន្ទីរពេទ្យ ឈរលើការឆ្លុះបញ្ចាំងពីការធ្វើរោគវិនិច្ឆ័យ រហូតដល់ដំណើរវិវត្តន៍នៃជំងឺ និងប្រសិទ្ធភាពនៃការព្យាបាល។ កិច្ចប្រជុំផ្តោតសំខាន់ផងដែរលើ តម្រូវការផ្សេងៗ ជាជំនួយបច្ចេកទេស សមត្ថភាពដឹកនាំ គ្រប់គ្រង រាប់ពីការទទួលអ្នកជំងឺតាំងពីដំបូង រហូតការសម្រេចបញ្ជូន និងផ្តល់ការបម្រើថែទាំព្យាបាលកម្រិតពហុឯកទេស នៅមន្ទីរពេទ្យជាតិ ចំពោះករណីស្មុគស្មាញ។
ឯកឧត្តមសាស្រ្តាចារ្យ បានឆ្លៀតពាំនាំនូវការផ្តាំផ្ញើសួរសុខទុក្ខ ជូនពរជ័យពីបងប្អូនសាធារណជន ក្រុមគ្រួសារអ្នកជំងឺដែលកំពុងសម្រាកក្នុងមន្ទីរពេទ្យ ដល់គ្រប់វីរយុទ្ធជនយើង ទាំងកំពុងទទួលការថែទាំព្យាបាល ទាំងកំពុងឈរជើងជួរមុខផងដែរ៕
