(បន្ទាយមានជ័យ)៖រដ្ឋបាលស្រុកមង្គលបូរី បានរៀបចំបើកកិច្ចប្រជុំឆ្លុះបញ្ចាំងស្តីពីអនុវត្តការងារគណនេយ្យភាពសង្គម ក្រោមអធិបតីភាពលោក កែវ តុម ប្រធានក្រុមប្រឹក្សាស្រុក លោក រ័ត្ន ដាស៊ីណង់ អភិបាលស្រុកមង្គលបូរី ។កិច្ចប្រជុំនេះបានធ្វើឡើងនៅសាលប្រជុំសាលាស្រុកមង្គលបូរី នាថ្ងៃទី២៨ ខែវិច្ឆិកា ឆ្នាំ២០២៥ ដោយមានការចូលរួមពីលោក លោកស្រី សមាជិកក្រុមប្រឹក្សាស្រុក អភិបាលរងស្រុក មេឃុំ ស្មៀន ទាំង១៣ ប្រធានកម្រងសាលាបឋមទាំង១៧ ប្រធានមណ្ឌលសុខភាពទាំង១៤ តំណាងអង្គការដៃគូ និងអ្នកសម្របសម្រួលគណនេយ្យភាពសហគមន៍(CAF) ដោយមានការគាំទ្រពីអង្គការទស្សនៈពិភពលោកអន្តរជាតិកម្ពុជាប្រចាំស្រុកមង្គលបូរីផងដែរ។
លោក សូ សាវលិញ ប្រធានការិយាល័យផែនការ និងគាំទ្រឃុំ បានឡើងធ្វើបទបង្ហាញអំពីការងារប្រចាំឆ្នាំ២០២៥ ឲ្យដឹងថា៖កិច្ចប្រជុំឆ្លុះបញ្ចាំងស្តីពីអនុវត្តការងារគណនេយ្យភាពសង្គមនាពេលនេះរួមមាន៖១,សាវរតាការងារគណនេយ្យភាពសង្គម ២,គោលបំណងនៃការងារគណនេយ្យភាពសង្គម ៣,គោលការណ៍នៃការងារគណនេយ្យភាពសង្គម ៤,យុទ្ធសាស្ត្រគណនេយ្យភាពសង្គម ៥,សមាសភាពគណនេយ្យភាពសង្គម ដំណាក់កាលទី២, ៦,យន្តការអនុវត្តគណនេយ្យភាពសង្គម ៧,រចនាសម្ព័ន្ធ នៃផែនការអនុវត្តគណនេយ្យភាពសង្គមដំណាក់កាលទី២, ៨,វដ្តសកម្មភាព និងជំហាននៃការងារគណនេយ្យភាពសង្គម និងទី៩,ឧបករណ៍សំខាន់ៗនៃការអនុវត្តការងារគណនេយ្យភាពសង្គម។
ក្នុងកិច្ចប្រជុំនោះផងដែរលោក សូ សាវលិញ បានមានមតិបន្តថា៖ គណនេយ្យភាពសង្គម គឺជាដំណើរការផ្សារភ្ជាប់ទំនាក់ទំនងគ្នារវាងប្រជាពលរដ្ឋ និងក្រុមប្រឹក្សា រដ្ឋបាលថ្នាក់ក្រោមជាតិ ដែលផ្តល់ឱកាសដល់ប្រជាពលរដ្ឋសម្តែងនូវមតិយោបល់និងចូលរួមតាមដានការ បំពេញរបស់អង្គភាពផ្តល់សេវា ទាំងអស់នេះពុំអាចខ្វះបានឡើយរវាង ផ្នែកផ្គត់ផ្គង់ និង ផ្នែកតម្រូវការ។
មានមតិសំណេះសំណាលក្នុងឱកាសនោះលោក រ័ត្ន ដាស៊ីណង់ អភិបាលស្រុកមង្គលបូរី បានលើកឡើងឲដឹងថា៖កិច្ចប្រជុំឆ្លុះបញ្ចាំងស្តីពីអនុវត្តការងារគណនេយ្យភាពសង្គមពិតជាមានសារៈសំខាន់ណាស់ គឺដើម្បីកំណត់គោលដៅបន្តសម្រាប់អនុវត្តឆ្នាំ២០២៦ខាងមុខនេះ។
លោក អភិបាលស្រុក បានបញ្ជាក់ថា៖ ការអនុវត្តគោលនយោបាយកំណែទម្រង់វិមជ្ឈការ និងវិសហមជ្ឈការ នៃកម្មវិធីជាតិសម្រាប់ការ អភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដោយស្របតាមគោលការណ៍ណែនាំពាក់ព័ន្ធ និងស្រប តាមគោលនយោបាយយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល និងដើម្បីបង្កើននូវ វប្បធម៌ប្រជាធិបតេយ្យ ដោយមានការចូលរួមពីប្រជាពលរដ្ឋ ការទទួលយកសំណូមពរ ការដោះស្រាយរាល់ បញ្ហានានាប្រកបដោយការទទួលខុសត្រូវចំពោះប្រជាពលរដ្ឋ។
ក្នុងនាមរដ្ឋបាលស្រុក ក្រុមប្រឹក្សាស្រុក លោក រ័ត្ន ដាស៊ីណង់ បានធ្វើការថ្លៃអំណរគុណដល់អង្គការទស្សនៈលោកដែលជាអង្គការដៃគូដ៏សំខាន់ ក្នុងការចូលរួមការងារគណនេយ្យភាពសង្គមជាបន្តបន្ទាប់រហូតមកដល់បច្ចុប្បន្ន។លោកសង្ឃឹមថាអង្គការទស្សនៈពិភពលោកនិងបន្តជួយការគាំទ្រនៅថ្ងៃខាងមុខបន្តទៀត៕
