ប៉ៃលិន៖លោកជំទាវបណ្ឌិត បាន ស្រីមុំ អភិបាល នៃគណៈអភិបាលខេត្តប៉ៃលិន នារសៀលថ្ងៃទី២៩ ខែវិច្ឆិកា ឆ្នាំ២០២៥ បានអញ្ជើញចុះពិនិត្យមើលសង្វាក់ផលិតកម្មសម្ងួតផ្លែមៀនប៉ៃលិនក្រៀម របស់វិស័យឯកជន សម្រាប់ធ្វើការនាំចេញទៅកាន់ទីផ្សារក្រៅប្រទេស ដែលមានទីតាំងនៅភូមិបុសស្អំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
លោកជំទាវបណ្ឌិត បាន ស្រីមុំ បានមានប្រសាសន៍លើកឡើងថា៖ បច្ចុប្បន្នរាជរដ្ឋាភិបាលកកម្ពុជា ដែលមានសម្តេច មហាបវរធិបតី ហ៊ុន ម៉ាណែត ជានាយករដ្ឋមន្ត្រី បានជំរុញឱ្យគ្រប់ភាគីពាក់ព័ន្ធ បណ្តុះបណ្តាលដល់សហគមន៍ ឬបណ្តុំកសិករ ដោយផ្តល់អ្នកជំនាញទៅបណ្តុះបណ្តាលដល់មូលដ្ឋានផ្ទាល់តែម្តង គឺធ្វើយ៉ាងណាឱ្យការដាំដុះរបស់ប្រជាកសិករទទួលបានទិន្នផលច្រើនចំណាយលើការផលិតតិច និងមានសុវត្ថិភាពដល់អ្នកប្រើប្រាស់ក៏ដូចជាអ្នកដាំផ្ទាល់ ជាពិសេសផលិតកសិផលទៅតាមតម្រូវការ ទីផ្សារក្នុងស្រុក និងនាំចេញទៅក្រៅប្រទេស។
នៅក្នុងឱកាសនោះផងដែរ លោកជំទាវបណ្ឌិតអភិបាលខេត្ត បានមានប្រសាសន៍ថ្លែងអំណរគុណដល់ក្រុមហ៊ុន ដែលបានបើករោងចក្រសហគ្រាស ដោយផ្ទាល់នៅលើទឹកដីខេត្តប៉ៃលិន ហើយជួយទិញផ្លែមៀនប៉ៃលិន ពីបងប្អូនប្រជាកសិករម្ចាស់ចំការធ្វើការសម្ងួតវេចខ្ចប់សម្រាប់នាំចេញនៅទីផ្សារក្រៅប្រទេស ហើយបានផ្តល់ការងារជាច្រើនដល់បងប្អូនប្រជាពលរដ្ឋនៅមូលដ្ឋាន ដែលជាកត្តាជួយជំរុញសេដ្ឋកិច្ចជីវភាពរបស់ប្រជាពលរដ្ឋ និងចូលរួមអនុវត្តនូវគោលនយោបាយរបស់រាជរដ្ឋាភិបាល គឺប្រទេសកម្ពុជា ក្លាយទៅជាប្រទេសចំណូលមធ្យមកម្រិតខ្ពស់នៅឆ្នាំ២០៣០៕
បើតាមរបាយការណ៍របស់មន្ទីរពាណិជ្ជកម្មខេត្ត បានឱ្យដឹងថា៖ ក្នុងរយៈពេល ៩ខែ ឆ្នាំ២០២៥នេះ ក្រុមហ៊ុន សហគ្រាស ដែលកែរច្នៃ សម្ងួត វេចខ្ចប់ផ្លែមៀនប៉ៃលិន បានធ្វើការនាំចេញផ្លែមៀនប៉ៃលិន ទាំងស្រស់ និងក្រៀម ចំនួន ជិត ១៥០០០តោន ទៅកាន់ទីផ្សារប្រទេសចិន សហរដ្ឋអាមេរិក និងសហគមន៍អឺរុប៕
