ខេត្តបន្ទាយមានជ័យ៖គ្រោះថ្នាក់ចរាចរណ៍ បាននិងកំពុងក្លាយទៅជាបញ្ហាដ៏ធំ ចំពោះអាយុជីវិត ក៏ដូចជាការរងរបួសស្រាលធ្ងន់ ខូចខាតទ្រព្យសម្បត្តិ ប៉ះពាល់ដល់សុខភាពសាធារណៈ និងការអភិវឌ្ឍសេដ្ឋកិច្ចជាតិ ដើម្បីដោះស្រាយនូវបញ្ហានេះ រាជរដ្ឋាភិបាលបានដាក់ចេញនូវគោលនយោបាយជាតិស្ដីពី សុវត្ថិភាពចរាចរណ៍ផ្លូវគោកដែលជា ត្រីវិស័យសម្រាប់កាត់បន្ថយគ្រោះថ្នាក់ចរាចរណ៍ពិសេសកាត់បន្ថយ ចំនួនអ្នកស្លាប់របួស ដោយសារគ្រោះថ្នាក់ ។នាព្រឹកថ្ងៃទី២៨ ខែវិច្ឆិកា ឆ្នាំ២០២៥ នៅម្ដុំភ្លើងស្តុបផ្លូវលេខ ១ ក្នុងក្រុងសិរីសោភ័ណ ខេត្តបន្ទាយមានជ័យ ក្រុមមន្ត្រីចម្រុះ រួមមាន មន្ត្រីចរាចរណ៍នៃស្នងការដ្ឋាននគរបាលខេត្ត មន្ត្រី មន្ទីរសារធារណការនិងដឹកជញ្ជូនខេត្ត និងក្រុមយុវជនសាខាកាកបាទក្រហមខេត្ត បានរួបរួមសហការគ្នាចុះធ្វើការអប់រំផ្សព្វផ្សាយចែកជូនខិត្តប័ណ្ណ ស្ទីកចំណាំងប្លាត ចំពោះយានយន្ត ទោចក្រយានយន្តគ្រប់ប្រភេទ សត្វនិងគោយន្តកន្ត្រៃ ជូនដល់បងប្អូនប្រជាពលរដ្ឋណាដែលកំពុងធ្វើចរាចរណ៍ ក្នុងគោលបំណងចូលរួមកាត់បន្ថយគ្រោះថ្នាក់ចរាចរណ៍ផ្លូវគោក ឲ្យនៅកម្រិតទាប។
លោកស្រី ប៉ាង ច្រិប ដែលជាអនុប្រធានមន្ទីរសាធារណការនិងដឹកជញ្ជូនខេត្តឲ្យដឹងថា អនុក្រុមការងារចម្រុះបានចុះសហការចុះពិនិត្យធ្វើការអប់រំផ្សព្វផ្សាយដល់បងប្អូនប្រជាពលរដ្ឋនៅក្នុងឱកាសនេះ ចង់ឲ្យបងប្អូនយល់ដឹងពីបញ្ហាហ្នឹងចូលរួមគោរពច្បាប់ចរាចរណ៍ផ្លូវគោក តែជាកត្តាចម្បងត្រូវបើកបរដោយប្រុងប្រយ័ត្ននិងមានការអត់ធ្មត់ ចេះអធ្យាស្រ័យគ្នាទៅវិញទៅមក ត្រូវចាំថាការប្រមាថលើការបើកបរគឺអាចមានគ្រោះថ្នាក់ដល់ខ្លួនឯងនិងអ្នកដទៃគួរបញ្ជាក់ផងដែរថា ក្នុងរយៈពេលមួយព្រឹកដែលក្រុមការងារចម្រុះបានចុះធ្វើការអប់រំផ្សព្វផ្សាយក្នុងឱកាសនេះសង្កេតឃើញថា បងប្អូនប្រជាពលរដ្ឋធ្វើដំណើរដោយទោចក្រយានយន្តដោយពុំបានពាក់មួកសុវត្ថិភាពគេច្រើនប្រមាណ ៦០%។ ដូចនេះឃើញថា មូលហេតុនិងកត្តាសំខាន់ៗនៃគ្រោះថ្នាក់ចរាចរណ៍ គឺមានបួន ទី១ បណ្ដាលមកពីកំណើនប្រជាជន,ទី២ កត្តាមនុស្ស ,ទី៣ កត្តាយានយន្តនិងទី៤ និងកត្តាផ្លូវថ្នល់។ ជាចុងក្រោយលោកស្រី ប៉ាង ច្រឹប ក៏បានធ្វើការអំពាវនាវដល់បងប្អូនប្រជាពលរដ្ឋដែលធ្វើដំណើរតាមដងផ្លូវជិតឬឆ្ងាយក្តី អ្នកបើកបររថយន្តត្រូវដាក់ខ្សែរក្រវ៉ាត់ អ្នកបើកបរទោចក្រយានយន្ត ត្រូវពាក់មួកសុវត្ថិភាពឲ្យបានគ្រប់គ្រប់គ្នា៕
