បន្ទាយមានជ័យ៖ពិតជារន្ធត់ណាស់បុរសជាជាងសំណង់នៅព្រំដែនកម្ពុជា–ថៃ ត្រឡប់មកមើលឪពុកដែលកំពុងសម្រាកព្យាបាលជម្ងឺនៅមន្ទីពេទ្យ ខណៈបើកបរម៉ូតូ ក៏ទាក់ដៃចង្កូតទាញចូលកង់រថយន្តធុនធំ បណ្តាលអោយរថយន្តកិនស្លាប់ភ្លាមៗនៅនឹងកន្លែង បង្កការភ្ញាក់ផ្អើលនៅថ្ងៃទី១៩ ខែវិច្ឆិកា ឆ្នាំ២០២៥ នៅលើកំណាត់ផ្លូវជាតិលេខ៥ ស្ថិតនៅក្នុងភូមិគោកទម្លាប់ ឃុំបន្ទាយនាង ស្រុកមង្គលបូរី។
មន្ត្រីនគរបាលចរសចរណ៍ផ្លូវគោកស្រុកមង្គលបូរីបានប្រាប់ឲ្យដឹងថា៖នៅមុនកើតឡើង ជនរងគ្រោះបានបើកបរម៉ូតូម៉ាកហុងដាឌ្រីម អិនស៊ីអ៊ិចពាក់ស្លាកលេខ បន្ទាយមានជ័យ1X-0357ម្នាក់ឯងឌុបគ្រឿងសំណង់ក្នុងទិសដៅពីត្បូងទៅជើង លុះមកដល់កន្លែងកើតហេតុខាងលើក៏ស្រាប់តែបានប៉ៈដៃចង្កូតទៅនឹងរថយន្តតូយូតាFORTUNERពាក់ផ្លាក់លេខបន្ទាយមានជ័យ2E-1519ក្នុងទិសដៅស្របគ្នា ភ្លាមនោះក៏បានដួលចូលកង់ក្រោយរថយន្តធុនធំម៉ាក់ FUSOពាក់ស្លាកលេខ ភ្នំពេញ3E-9042និងរម៉កក្រោយពាក់ស្លាកលេខ ព្រៈសីហនុ 4A-3215បណ្តាលរថយន្តកិនស្លាប់ភ្លាមៗ ក្រោយពីកើតហេតុអ្នកបើកបររថយន្តបានគេចខ្លួនបាត់ស្រមោល។
មន្ត្រីនគរបាលជំនាញបានបន្តថា៖សាកសពមានឈ្មោះ ទេព សំភី ភេទប្រុស អាយុ ៣៧ឆ្នាំ រស់នៅភូមិកកោះ ឃុំស្រក្រាម ស្រុកស្វាយចេក ក្រោយពិនិត្យវាស់វែងហើយ សាកសពជនរងគ្រោះដែលជាប់ក្រោមកង់រថយន្ត ត្រូវបានថយទាញយកសាកសពចេញប្រគល់ជូនសាច់ញាតិយកទៅធ្វើបុណ្យតាមប្រពៃណី។គេស្គាល់អត្តសញ្ញាណ។រីឯរថយន្តបង្ក ២គ្រឿងនិងម៉ូតូរងគ្រោះ ត្រូវនាំយកទៅរក្សាទុកនៅអធិការដ្ឋាននគរបាលស្រុកមង្គលបូរី ដើម្បីរងចាំដោះស្រាយបន្តតាមនិតិវិធីជាក្រោយ៕
