ខេត្តបន្ទាយមានជ័យ៖ការប្រមាថនៅក្នុងការបើកបរ គឺជាការប្រមាថដល់អាយុជីវិតរបស់ខ្លួនឯង ក៏ដូចជាអាយុជីវិតរបស់អ្នកដទៃផងដែរ។ លោកវរសេនីយ៍ឯក គី មករា ប្រធានការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តបន្ទាយមានជ័យ មានប្រសាសន៍បែបនេះ ក្នុងឱកាសដែលលោកកំពុងដឹកនាំ ធ្វើសកម្មភាព អប់រំផ្សព្វផ្សាយសុវត្ថិភាពចរាចរណ៍ផ្លូវគោក ដោយមានការចូលរួមពីមន្ត្រីមន្ទីរសាធារណការនិងដឹកជញ្ជូនខេត្តបន្ទាយមានជ័យក្រុមយុវជនកាកបាទក្រហមនាព្រឹកថ្ងៃទី១៧ ខែកុម្ភៈ ឆ្នាំ២០២៦ នៅរង្វង់មូលយាយជី ច្រូតស្រូវ ក្នុងស្រុកមង្គលបូរី។
លោក គី មករា បានឲ្យដឹងថា ការចុះធ្វើការអប់រំផ្សព្វផ្សាយអំពីសុវត្ថិភាពចរាចរណ៍ផ្លូវគោកនៅក្នុងឱកាសនេះ ពិតជាមានសារសំខាន់ណាស់ ចំពោះបងប្អូនប្រជាពលរដ្ឋ ដែលកំពុងចរាចរតាមដងផ្លូវក៏ដូចជាបានបញ្ជាក់នូវអារម្មណ៍ស្មារតីដល់បងប្អូនយល់ដឹងពីច្បាប់ចរាចរណ៍ផ្លូវគោក ក៏ដូចជាការចូលរួមចំណែកនៅក្នុងការការពារ សុវត្ថិភាពដើម្បីកាត់បន្ថយគ្រោះថ្នាក់ចរាចរណ៍នៅក្នុងព្រះរាជាណាចក្រកម្ពុជា ក៏ដូចជាការគោរពច្បាប់ចរាចរណ៍គឺជាកត្តាចម្បង ប៉ុន្តែការ បើកបរ ចេះយោគយល់ អធ្យាស្រ័យគ្នា ជាកត្តាសំខាន់ផងដែរ ។
លោក គី មករា បានឲ្យដឹងទៀតថា គ្រោះថ្នាក់ចរាចរណ៍ដែលកំពុងប្រែក្លាយទៅជាបញ្ហាដ៏ធំចំពោះសុខសុវត្ថិភាពសាធារណៈនិងការអភិវឌ្ឍសេដ្ឋកិច្ចជាតិបើតាមរបាយការណ៍និងការស្រាវជ្រាវបានឲ្យដឹងថាមូលហេតុចម្បងដែលនាំឲ្យមានបញ្ហាគ្រោះថ្នាក់ចរាចរណ៍គឺបណ្ដាលមកពីកត្តាមនុស្សកត្តាយានយន្ត កត្តាផ្លូវនិងកំណើនយានយន្ត។ ហើយចំពោះគ្រោះថ្នាក់ចរាចរណ៍ភាគច្រើនបណ្ដាលមកពីកត្តាមនុស្សបើកបរហួសល្បឿនកំណត់និងក្នុងស្ថានភាពបាត់បង់ម្ចាស់ការនិងបើកបរក្រោមឥទ្ធិពលនៃគ្រឿងស្រវឹងឬគ្រឿងញៀនជាដើម៕
