បន្ទាយមានជ័យ ៖ ដើម្បីប្រសិទ្ធភាពនៃការអនុវត្តនូវគោលនយោបាយភូមិ ឃុំ–សង្កាត់ កាន់មានប្រសិទ្ធភាពបន្ថែមទៀត អភិបាលក្រុងសិរីសោភ័ណ បានធ្វើការអំពាវនាវដល់បងប្អូនប្រជាពលរដ្ឋក្នុងមូលដ្ឋាន បន្តចូលរួមរាយការណ៍អំពីបទល្មើសដែលកើតមាននៅក្នុងមូលដ្ឋានរបស់ខ្លួន ដើម្បីធ្វើយ៉ាងណាឱ្យកងកម្លាំងមានសមត្ថកិច្ច អន្តរាគមន៍ និងបង្ក្រាបបានទាន់ពេលវេលា។ អភិបាល ក្រុងសិរីសោភ័ណមានប្រសាសន៍បែបនេះក្នុងវេទិកាផ្សព្វផ្សាយ ពិគ្រោះយោបល់របស់ក្រុមប្រឹក្សាក្រុងសិរីសោភ័ណ ជូនដល់សង្កាត់អូរអំបិល និងសង្កាត់ទឹថ្លា ដែលជាសង្កាត់ចុងក្រោយនៃសង្កាត់ទាំង៧។ ពិធីនេះ ធ្វើឡើងនៅវត្ត សុភមង្គល ស្ថិតនៅក្នុងសង្កាត់អូរអំបិល ក្រុងសិរីសោភ័ណ នាថ្ងៃទី១៥ ខែសីហា ឆ្នាំ២០២៦ ដោយមានការចូលរួមពីលោក ជាម សុខ ប្រធាក្រុមប្រឹក្សាក្រុង សមាជិក ក្រុមប្រឹក្សាក្រុង គណៈអភិបាលរង ក្រុង កងកម្លាំង ពាក់ព័ន្ធអាជ្ញាធរមូលដ្ឋាននៃសង្កាត់ទាំង២ រួមនឹបងប្អូនប្រជាពលរដ្ឋចូលរួមប្រមាណជាង២០០នាក់ផងដែរ។
ជាមួយគ្នានោះលោក ស្រេង សុផល អភិបាលក្រុងសិរីសោភ័ណ ក៏បានថ្លែងនូវការកោតសរសើរចំពោះកងកម្លាំងមានសមត្ថកិច្ច ក៏ដូចជាអាជ្ញាធរមូលដ្ឋាន រួមនឹងបងប្អូនប្រជាពលរដ្ឋដែលកន្លងមកបានចូលរួមយ៉ាងផុសផុលក្នុងការអភិវឌ្ឍមូលដ្ឋាន ក៏ដូចជាចូលរួមអនុវត្តគោលនយោបាយ ភូមិ ឃុំ–សង្កាត់មានសុវត្ថិភាពប្រសិទ្ធភាព។
ទន្ទឹមជាមួយគ្នានោះលោកអភិបាលក្រុង ក៏បានធ្វើការអំពាវនាវបន្ថែមទៅដល់អាជ្ញាធរមូលដ្ឋាននៅក្នុងសង្កាត់ទាំង៧ ភូមិរួមនឹងបងប្អូនប្រជាពលរដ្ឋ ត្រូវបន្តសហការ រាយការណ៍ពីបទល្មើសឆបោកតាមប្រព័ន្ធបច្ចេកវិទ្យា (Online Sacms) នៅក្នុងមូលដ្ឋានសង្កាត់ទាំង៧។ មួយវិញទៀតតាមបណ្ដាសណ្ឋាគារ ផ្ទះសំណាក់ ទីតាំងប្រមូលផ្ដុំ បើសិនជាមានជនបរទេសដែលមកស្នាក់នៅ ឬធ្វើការនៅក្នុងមូលដ្ឋានរបស់ខ្លួនសូមរាយការណ៍មកអាជ្ញាធរដើម្បីចុះធ្វើរដ្ឋបាល ។ ហើយបើមានការសង្ស័យថា នូវទីតាំងណាមួយមានការបង្កប់នូវករណីឆបោកតាមប្រព័ន្ធបច្ចេកវិទ្យា (Online Scams) សូមរាយការមកកម្លាំងមានសមត្ថកិច្ច ដើម្បីធ្វើការបង្ក្រាបឱ្យបានទាន់ពេលវេលា។
លោក ស្រេង សុផល អភិបាលក្រុងបន្តថា ការចូលរួមរបស់ប្រជាពលរដ្ឋ គឺជាកត្តាលីករដ៏សំខាន់បំផុតក្នុងការជំរុញឱ្យការអនុវត្ត «គោលនយោបាយភូមិ ឃុំ–សង្កាត់មានសុវត្ថិភាព» ទទួលបានជោគជ័យ និងមានប្រសិទ្ធភាពខ្ពស់៕
