(បន្ទាយមានជ័យ) អង្គការទស្សនៈពិភពលោកអន្តរជាតិ ប្រចាំនៅកម្ពុជា សហការជាមួយក្រសួងអភិវឌ្ឍន៍ជនបទបានរៀបចំពិធីសម្ពោធការដាក់ឲ្យដំណើរការគម្រោងសេវាគ្រប់ដណ្ដប់ទឹកស្អាត និងអនាម័យជាសកល តំបន់អភិវឌ្ឍន៍ស្រុកភ្នំស្រុក ក្រោមអធិបតីភាពលោក យឹម សំណាង អភិបាលរង ខេត្ត តំណាងឯកឧត្តម អ៊ុំ រាត្រី អភិបាលខេត្តបន្ទាយមានជ័យ។ពិធីនេះបានធ្វើនៅភោជនីយដ្ឋាន លី ក្រុស ស្រុកភ្នំស្រុក នៅព្រឹកថ្ងៃអង្គារ៍ ទី១០ ខែកុម្ភៈ ឆ្នាំ២០២ ដោយមានចូលរួមពីលោក ឈន តុលា ប្រធានប្រតិបត្តិខេត្តបន្ទាយមានជ័យ និងសៀមរាប នៃអង្គការទស្សនៈពិភពលោកអន្តរជាតិ.កម្ពុជា និងលោក លោកស្រី មន្ទីរអង្គភាពពាក់ព័ន្ធ អង្គការក្រៅរដ្ឋាភិបាលជាតិ មិនអន្តរជាតិស្ថាប័នឯកជននិងគណៈកម្មការគ្រប់គ្រងទឹក ព្រមទាំងអាជ្ញាធរមូលដ្ឋានភូមិ ឃុំ/សង្កាត់ផងដែរ។
លោក ឈន តុលា បានឡើងមានមតិស្វាគមន៍ឲ្យដឹងថា៖ អង្គការទស្សនៈពិភពលោក គឺជាអង្គការមនុស្សធម៌ឈានមុខគេមួយ បាននឹងកំពុង បំពេញរបសកកម្មរបស់ខ្លួនក្នុងប្រទេសចំនួនជិត១០០ ដើម្បីជួយធ្វើឲ្យជីវិតកុមារងាយរងគ្រោះបានប្រសើរឡើង។ ក្នុងអំឡុងជាង៧០ឆ្នាំមកនេះ យើងបានធ្វើការជាដៃគូរជុំវិញពិភពលោក ដែលនាំមកនូវប្រសិទ្ធិភាពការងារកាន់តែប្រសើរឡើងសម្រាប់កុមារ ទទួលបានជីវិតពេញបរិបូរណ៍ និងនាំមកនូវកិច្ចការងារអភិវឌ្ឍន៍ប្រកបដោយយោចរភាព។ ក្នុងសេចក្តីជំនឿថាគ្រីស្ទបរិស័ ឬ យើងជឿជាក់ថាមនុស្សគ្រប់រូបពិតជាមានតំលៃ ដូច្នេះហើយ យើងធ្វើការជាមួយមនុស្សគ្រប់ទាំងអស់ ដោយ មិនប្រកាន់សាសនា ភេទ ជនជាតិ ឬ បក្សនយោបាយណាមួយនោះទេ។
លោក ឈន តុលា បានបញ្ជាក់ថា៖អង្គការទស្សនៈពិភពលោកអន្តរជាតិ ប្រចាំខេត្តបន្ទាយមានជ័យ បានចាប់ផ្តើមអនុវត្តន៍គម្រោង អស់រយៈ ពេលជាង១៨ ឆ្នាំកន្លងមកហើយចាប់តាំងពីឆ្នាំ តាំងពីឆ្នាំ ២០១០ ក្នុងស្រុកចំនួន៥គឺ ស្រុកមង្គលបូរី,ព្រះនេត្រព្រះ,ស្វាយចេក, ថ្មពួក និងស្រុកភ្នំស្រុក។
ថ្លែងក្នុងឱកាសនោះលោក យឹម សំណាង អភិបាលរងខេត្ត បានមានប្រសាសន៍លើកដឹងថា៖ គម្រោងនេះពិតជាមានសារៈសំខាន់យ៉ាងខ្លាំងក្នុងការចូលរួមលើកកម្ពស់វិស័យអនាម័យទឹកស្អាត តាមជនបទ ហ្នឹងឱ្យសម្រេចបាននៅគោលដៅអភិវឌ្ឍន៍ សហស្សវត្សកម្ពុជា២០៣០។
លោក យឹម សំណាង បានធ្វើការសំណូមពរដល់បងប្អូនប្រជាពលរដ្ឋទាំងអស់ សូមចូលរួមថែរក្សាសមិទ្ធផល ដែលទទួលបានថ្មីនេះ គម្រោងសេវាគ្រប់ដណ្ដប់ទឹកស្អាតនិងអនាម័យជាសកល និងថែទាំឱ្យបានគង់វង្សយូរអង្វែង។ពិសេសត្រូវបន្តសហការយ៉ាងជិតស្និទ្ធជាមួយអង្គការទស្សនៈពិភពលោកដើម្បីបន្តការងារអភិវឌ្ឍន៍នៅក្នុងសហគមន៍ជានិរន្តរ៍៕
