(កំពង់ចាម)៖ ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម ថ្លែងថា ការគ្រប់គ្រងនិងការពារដីសាធារណៈរបស់រដ្ឋ ជាពិសេសដីចំណីប្រភពទឹកធម្មជាតិ រួមមាន: ដីចំណីទន្លេ ព្រែក និងបឹងបួរ គឺដើម្បីធានាបាននូវការអភិវឌ្ឍ ថែរក្សាសណ្តាប់ធ្នាប់ របៀបរៀបរយ និងបរិស្ថានប្រកបដោយចីរភាព។
ឯកឧត្តម អភិបាលខេត្ត មានប្រសាសន៍បែបនេះក្នុងឱកាសអញ្ជើញដឹកនាំកិច្ចប្រជុំគណៈកម្មាធិការរៀបចំដែនដី និងនគរូបនីយកម្មថ្នាក់ខេត្ត ដើម្បីពិនិត្យ និងពិភាក្សាលើបទបង្ហាញពាក់ព័ន្ធនឹងស្ថានភាពការកាន់កាប់ដីចំណីទន្លេ ព្រែក និងបឹងបួរ ក្នុងភូមិសាស្ត្រខេត្តកំពង់ចាម នាព្រឹកថ្ងៃទី៦ ខែសីហា ឆ្នាំ២០២៦ នៅសាលាប្រជុំធំសាលាខេត្ត ដោយមានការអញ្ជើញចូលរួមពីសំណាក់ អភិបាលរងខេត្ត នាយក នាយករងរដ្ឋបាល ប្រធាន–អនុប្រធានមន្ទីរ–អង្គភាពជំនាញពាក់ព័ន្ធជុំវិញខេត្ត អភិបាល អភិបាលរងក្រុង–ស្រុក និងមន្ត្រីពាក់ព័ន្ធជាច្រើនរូប។
ក្នុងឱកាសនោះ ឯកឧត្តមអភិបាលខេត្ត បានណែនាំដល់អាជ្ញាធរដែនដី និងមន្ទីរ–អង្គភាពពាក់ព័ន្ធ ត្រូវសិក្សាលើបទបង្ហាញបច្ចេកទេសឱ្យបានលម្អិត និងផ្ទៀងផ្ទាត់ស្ថានភាពជាក់ស្តែងនៃការកាន់កាប់ដីចំណីទន្លេ ព្រែក និងបឹងបួរ។ កំណត់ព្រំប្រទល់ និងចាត់វិធានការទប់ស្កាត់ការទន្ទ្រានកាន់កាប់ដីសាធារណៈរបស់រដ្ឋដោយខុសច្បាប់ឱ្យបានម៉ឺងម៉ាត់។ បង្កើនការយល់ដឹងដល់ប្រជាពលរដ្ឋអំពីច្បាប់រៀបចំដែនដី និងផលប៉ះពាល់នៃការរំលោភបំពានដីចំណីទឹក។
ឯកឧត្តមអភិបាលខេត្ត បានសង្កត់ធ្ងន់ថា ថ្វីត្បិតតែខេត្តកំពង់ចាមបានសម្រេចជោគជ័យក្នុងការចុះបញ្ជី និងចែកប័ណ្ណកម្មសិទ្ធិដីធ្លីលក្ខណៈជាប្រព័ន្ធជូនប្រជាពលរដ្ឋរួចរាល់យ៉ាងណាក្តី ក៏អាជ្ញាធរខេត្តនៅតែបន្តយកចិត្តទុកដាក់ខ្ពស់លើការគ្រប់គ្រង ដីសាធារណៈរបស់រដ្ឋ ឱ្យបានគង់វង្ស៕
