(បន្ទាយមានជ័យ) អគារមជ្ឈមណ្ឌលសិក្សាពេញមួយជីវិតថ្មពួក ដែលចំណាយថវិកាអស់ប្រមាណជាង ៧៨.៥៤២.២៨ដុល្លារសហរដ្ឋអាមេរិក ជាអំណោយដ៏ថ្លៃថ្លារបស់អង្គការកុមារឥតព្រំដែនអន្តរជាតិ(Knk international) ត្រូវបានសម្ពោធដាក់ឲ្យប្រើប្រាស់ជាផ្លូវការ នាថ្ងៃទី២៤ ខែមិថុនា ឆ្នាំ២០២៦ ។ដែលពិធីនេះបានប្រព្រឹត្តទៅនៅបរិវេណការិយាល័យអប់រំ យុវជន និងកីឡា ក្រោមអធិបតីភាពឯកឧត្តម ប្លែក វ៉ារី ប្រធានក្រុមប្រឹក្សាខេត្តបន្ទាយមានជ័យ និងលោក ឃូ ពៅ អភិបាលរង ខេត្ត តំណាងឯកឧត្ដម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ លោក រ័ត្ន ដាស៊ីណង់ អាភិបាលស្រុកថ្មពួក លោកស្រី សាកាន នាយកអង្គការកុមារឥតព្រំដែនអន្តរជាតិ ប្រចាំប្រទេសកម្ពុជា លោក ហង្ស សុវណ្ណ អនុប្រធាននាយកដ្ឋានអប់រំក្រៅប្រព័ន្ធ និងបរិយាបន្ន លោក លោកស្រី មន្ទីរអង្គភាពពាក់ព័ន្ធ អាជ្ញាធរមូលដ្ឋានភូមិ ឃុំ ក្រុមប្រឹក្សាឃុំ កងកម្លាំង និងយុវជន ស.ស.យ.ក. និងយុវជនអភិវឌ្ឍន៍ស្រុក លោកគ្រូ អ្នកគ្រូ និងសិស្សានុសិស្សជាច្រើននាក់ផងដែរ។
លោក រ័ត្ន ដាស៊ីណង់ អភិបាលស្រុកថ្មពួក និងលោកស្រី សាកាន នាយកអង្គការកុមារឥតព្រំដែនអន្តរជាតិ ប្រចាំប្រទេសកម្ពុជា បានឱ្យដឹងថា៖ អគារមជ្ឈមណ្ឌលសិក្សាពេញមួយជីវិតថ្មពួក ដែលនឹងត្រូវដាក់សម្ពោធឱ្យប្រើប្រាស់ជាផ្លូវការនេះ មានចំនួន៣បន្ទប់ ស្មើនឹង ៣ថ្នាក់រៀន សាងសង់ពីឥដ្ឋ ដោយមានរចនាបថជាខ្មែរ ដែលមានទំហំ១២x១៦ម៉ែត្រ និងមានបន្ទប់ទឹកចំនួន១ខ្នង ស្មើនឹង ២បន្ទប់។ នៅចុងឆ្នាំ២០២៥ ដល់ខែមេសា ឆ្នាំ២០២៦ មជ្ឈមណ្ឌលបានចាប់ផ្តើមបើកវគ្គបណ្តុះបណ្តាលវិជ្ជាជីវៈ ដោយបានបើកវគ្គជំនាញសម្អាងកាយ និងជួសជុលម៉ាស៊ីនត្រជាក់ មានរយៈពេលបណ្តុះបណ្តាលចំនួន ៥ខែ ដោយទទួលបានសិក្ខាកាមចុះឈ្មោះចូលរៀនដើមគ្រាសរុបទាំងពីរជំនាញចំនួន ៤១នាក់ (ស្រី ២៧នាក់) នឹងបានបញ្ចប់វគ្គបណ្តុះ បណ្តាលដោយជោគជ័យចំនួន ៣៤នាក់ (ស្រី២១នាក់) ក្នុងនោះសិស្សបោះបង់ចំនួន ៧នាក់។
លោកស្រី សាកាន នាយកអង្គការ បានបញ្ជាក់បន្ថែមថា៖ សម្រាប់ស្រុកថ្មពួកនេះ គឺជាស្រុកទី៥ និងជាស្រុកចុងក្រោយបង្អស់សម្រាប់ខេត្តបន្ទាយមានជ័យ ដែលទទួលបានអគារមជ្ឈមណ្ឌលសិក្សាពេញមួយជីវិត ក្រោមគម្រោងគាំទ្រដល់ការកសាងសមត្ថភាពយុវជនបោះបង់ការសិក្សា។
ថ្លែងនៅក្នុងឱកាសនោះដែរលោក ឃូ ពៅ អភិបាលរងខេត្ត បានថ្លែងអំណរគុណយ៉ាងជ្រាលជ្រៅជំនួសមុខឱ្យប្រជាពលរដ្ឋ និងអាជ្ញាធរខេត្ត ជូនចំពោះសប្បុរសជន ជាពិសេសរដ្ឋាភិបាល និងប្រជាជនជប៉ុន ព្រមទាំងអង្គការកុមារឥតព្រំដែនអន្តរជាតិ(Knk international) ដែលបានផ្តល់សមិទ្ធផលដ៏មានតម្លៃនេះ ដើម្បីជួយបណ្ដុះបណ្ដាលវិជ្ជាជីវៈជូនដល់យុវជន យុវនារីកម្ពុជា ឱ្យមានជំនាញច្បាស់លាស់សម្រាប់ប្រកបរបរចិញ្ចឹមជីវិត និងរួមចំណែកជាមួយរាជរដ្ឋាភិបាលក្នុងការកាត់បន្ថយភាពក្រីក្រ។
ទន្ទឹមនឹងនោះដែរលោក អភិបាលរងខេត្ត ក៏បានធ្វើការសំណូមពរត្រង់ៗទៅកាន់តំណាងអង្គការកុមារឥតព្រំដែនអន្តរជាតិ(Knk international) សូមមេត្តាបន្តជួយកសាងនូវអាគារមជ្ឈមណ្ឌលសិក្សាពេញមួយជីវិត ចំនួន៤ស្រុក បន្ថែមទៀតនៅក្នុងខេត្តបន្ទាយមានជ័យ ដើម្បីបន្តផ្ដល់ឱកាសឱ្យយុវជននិងយុវនារីផ្សេងទៀត បានចាប់យកជំនាញបច្ចេកទេសសម្រាប់ចិញ្ចឹមជីវិតទៅថ្ងៃអនាគតផងដែរ៕
