(បន្ទាយមានជ័យ)៖ជនជាតិថៃចំនួន៤៩នាក់ ក្នុងនោះស្រី ១៨នាក់ (ពាក់ព័ន្ធបទល្មើស Scam online) ដែលបានប្រព្រឹត្តនៅក្នុងព្រះរាជាណាចក្រកម្ពុជា ត្រូវបានកម្លាំងមត្ថកិច្ចចាប់ឃាត់ខ្លួន រួចរៀបចំនិតិវិធីបណ្តេញចេញតាមច្រកទ្វាព្រំដែនអន្តរជាតិប៉ោយប៉ែត នាថ្ងៃទី២៣ ខែមិថុនា ឆ្នាំ២០២៦ ។
នៅក្នុងរង្វង់ប្រតិបត្តិការណ៍រៀបចំបណ្តេញជនជាតិថៃនាពេលនេះគឺមានវត្តមានលោកឧត្ដមសេនីយ៍ត្រី អ៊ី ចំរើន នាយប៉ុស្តិ៍នគរបាលច្រកទ្វារព្រំដែនអន្តរជាតិប៉ោយប៉ែត បានដឹកនាំមន្ត្រីក្រោមឱវាទ សហការជាមួយកម្លាំងស្នាក់ការត្រៀមបណ្ដេញចេញខេត្តសៀមរាប នាយកដ្ឋានស៊ើបអង្កេត និងអនុវត្តនីតិវិធី អគ្គនាយកដ្ឋានអន្តោប្រវេសន៍ ដឹកនាំដោយលោកឧត្ដមសេនីយ៍ទោ យឿម ម៉ាន់ អនុប្រធាននាយកដ្ឋានស៊ើបអង្កេត និងអនុវត្តនីតិវិធី និងលោកឧត្ដមសេនីយ៍ត្រី អេង លីហួរ ស្នងការរង នៃស្នងការដ្ឋាននគរបាលខេត្តបន្ទាយមានជ័យ បានធ្វើការប្រគល់ទទួល និងបញ្ជូនចេញពីប្រទេសនូវជនជាតិថៃ(ពាក់ព័ន្ធបទល្មើស Scam online) ចំនួន៤៩នាក់ ក្នុងនោះស្រី១៨នាក់ ។
ការបង្ក្រាប និងបណ្តេញជនបរទេសជាបន្តបន្ទាប់នេះ គឺជាការឆ្លុះបញ្ចាំងពីការប្តេជ្ញាចិត្តយ៉ាងម៉ឺងម៉ាត់របស់រាជរដ្ឋាភិបាលកម្ពុជា និងអគ្គនាយកដ្ឋានអន្តោប្រវេសន៍ ក្នុងការលប់បំបាត់បោសសម្អាតនូវបទល្មើស បច្ចេកវិទ្យា(Scam online) និងការស្នាក់នៅដោយខុសច្បាប់ ដើម្បីការពារមុខមាត់ប្រទេសជាតិ និងសេដ្ឋកិច្ចសង្គមកម្ពុជា រក្សាការពារសន្តិសុខ និងសណ្តាប់ធ្នាប់សាធារណៈ ព្រមទាំងលើកកម្ពស់ប្រសិទ្ធភាព នៃកិច្ចសហប្រតិបត្តិការក្នុងការប្រយុទ្ធប្រឆាំងនូវឧក្រិដ្ឋកម្ម ៕
