(បន្ទាយមានជ័យ)៖នារសៀលថ្ងៃទី៨–១១ ខែមិថុនា ឆ្នាំ២០២៦ នៅទីស្នាក់ការសាខាកាកបាទក្រហមខេត្តបន្ទាយមានជ័យ បានបិទវគ្គបណ្តុះបណ្តាលគ្រូបង្គោល ស្ដីពីការអប់រំអំពីហានិភ័យនៃគ្រាប់មីនសំណល់ជាតិផ្ទុះ ពីសម័យសង្គ្រាមនិងប្រតិបត្តិអង្គការមនុស្សធម៌ប្រកបដោយសុវត្ថិភាពសម្រាប់អ្នកស្ម័គ្រចិត្ត ក្រោមអធិបតីភាព លោក មុំ ភិរក្ស នាយរងនាយកដ្ឋានកាកបាទក្រហមកម្ពុជា លោក ប៊ស្នុ ម៉ាហាត អ្នកជំនាញផ្នែកអាវុធយុទ្ធភណ្ឌ គណៈកម្មាធិការអន្តរជាតិ កាកបាទក្រហម(ICRC) លោក ឃុន វុទ្ធី អនុប្រធានគណៈកម្មាធិការសាខាកាកបាទក្រហមខេត្ត តំណាងឯកឧត្តម អ៊ុំ រាត្រី ប្រធានគណៈកម្មាធិការសាខា ដោយកម្មវិធីវគ្គបណ្ដុះបណ្ដាលនេះឧបត្ថម្ភកម្មវិធីដោយគណៈកម្មាធិការអន្តរជាតិនៃកាកបាទក្រហម(ICRC)។ មានប្រសាសន៍ក្នុងវគ្គបណ្តុះបណ្តាល នៅថ្ងៃនេះផងដែរ លោក ឃុនវុទ្ធី បានឲ្យដឹងថា វគ្គបណ្ដុះបណ្ដាលនេះ មានរយៈពេល៤ថ្ងៃ ចាប់ពីថ្ងៃទី៨ថ្ងៃទី១១ ខែមិថុនា ឆ្នាំ២០២៦ ក្នុងគោលបំណង ចូលរួមចំណែកលើកកម្ពស់សុខភាពនិងតម្លៃមនុស្សធម៌កាត់បន្ថយអត្រាស្លាប់ និងរងរបួសដោយសារមីន និងយុទ្ធភណ្ឌមិនទាន់ផ្ទុះជាពិសេសបង្កើតសមត្ថភាពដល់មន្ត្រីប្រតិបត្តិសាខា អនុសាខា អ្នកស្ម័គ្រចិត្តកាកបាទក្រហមកម្ពុជា ដែលកំពុងរស់នៅតាមខ្សែបន្ទាត់ព្រំដែន និងកំពុងបំពេញភារកិច្ចនៅ មណ្ឌលភៀសសឹក និងត្រៀមឆ្លើយតបចំពោះគ្រោះមន្តរាយវិបត្តិភ័យផ្សេងៗ ឲ្យបានទាន់ពេលវេលា និងប្រកបដោយសុវត្ថិភាព។
លោកបានបន្តថា វគ្គបណ្តុះបណ្តាលនេះពិតជាមានសារៈសំខាន់ខ្លាំងណាស់ សម្រាប់មន្ត្រីសាខា អនុសាខាពិសេសអ្នកស្ម័គ្រចិត្តកាកបាទក្រហមកម្ពុជា ដើម្បីក្លាយជាគ្រូបង្គោលដែលមាន សមត្ថភាព ហើយយកចំណេះដឹងនេះ ទៅអប់រំផ្សព្វផ្សាយបន្តដល់ប្រជាពលរដ្ឋដែលរស់នៅតំបន់ប្រឈមក្នុងខេត្តបន្ទាយមានជ័យ ហើយលោកសង្ឃឹមផងដែរថា សិក្ខាកាមដែលមានវត្តមាននៅទីនេះ ពិតជាខិតខំប្រឹងប្រែងអស់ពីកម្លាំងកាយចិត្ត ចូលរួមគ្រប់សកម្មភាពជាមួយគ្រូឧទ្ទេសដើម្បីយកចំណេះដឹង ទៅផ្សាយដល់សហគមន៍របស់យើង។
គួរបញ្ជាក់ផងដែរថា ខេត្តបន្ទាយមានជ័យ ជាខេត្តដែលត្រូវភាគីថៃហ៊ុមព័ទ្ធយកដីរបស់ប្រជាពលរដ្ឋចំនួន ២ភូមិក្នុងស្រុកអូរជ្រៅភូមិតំបន់បឹងត្រកួនចំនួន ៦ភូមិដែលមានគ្រួសារសរុបប្រមាណជាង២៨៩៤គ្រួសារ កុមារចំនួន ៣១១៦គ្រួសារ ដែលកំពុងរងគ្រោះជាពិសេសផ្នែកផ្លូវចិត្តរបស់ពួកគាត់ នុងប្រជាពលរដ្ឋមួយចំនួនមិនហ៊ានបង្កបង្កើនផលកសិកម្មនោះឡើយ ចុងបញ្ចប់នៃកម្មវិធីបិទវគ្គនៃគណៈអធិបតីបានប្រគល់វិញ្ញាបនបត្រដល់សិក្ខាកាមអ្នកស្ម័គ្រចិត្ត៕
