បន្ទាយមានជ័យ ៖ រដ្ឋបាលខេត្តបន្ទាយមានជ័យ បានរៀបចំពិធីប្រកាសចូលកាន់មុខតំណែងអភិបាលរង នៃគណៈអភិបាលខេត្តបន្ទាយមានជ័យក្រោមអធិបតីភាពដ៏ខ្ពង់ខ្ពស់ ឯកឧត្តម ផាន់ ចាន់ធុល រដ្ឋលេខាធិការ ក្រសួងមហាផ្ទៃ តំណាងដ៏ខ្ពង់ខ្ពស់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។ ពិធីនេះបានប្រារព្ធធ្វើឡើងនៅសាលប្រជុំ ក សាលាខេត្តបន្ទាយមានជ័យ នាព្រឹកថ្ងៃទី០៨ ខែមិថុនា ឆ្នាំ២០២៦ដោយមានការអញ្ជើញចូលរួមពីសំណាក់ប្រតិភូអមដំណើរ ឯកឧត្តម ប្លែក វ៉ារី ប្រធានក្រុមប្រឹក្សាខេត្ត ឯកឧត្តម អ៊ុំ រាត្រី អភិបាលនៃគណៈអភិបាលខេត្ត ព្រមទាំងមានការអញ្ជើញចូលរួមពីសំណាក់ថ្នាក់ដឹកនាំ មន្ត្រីរាជការ មន្ទីរ អង្គភាព ស្ថាប័នពាក់ព័ន្ធ អភិបាលក្រុង–ស្រុក អាជ្ញាធរមូលដ្ឋានផងដែរ។
នាឱកាសនោះឯកឧត្តម ផាន់ ចាន់ធុល បានសំដែងនូវការកោតសរសើរ និងវាយតម្លៃខ្ពស់ចំពោះ ក្រុមប្រឹក្សា គណៈអភិបាល ខេត្តបន្ទាយមានជ័យ ថ្នាក់ដឹកនាំ មន្ត្រីរាជការ អាជ្ញាធរគ្រប់លំដាប់ថ្នាក់ និងប្រជាពលរដ្ឋទូទាំងខេត្ត ដែលបានខិតខំប្រឹងប្រែងរួមគ្នាយ៉ាងសកម្មក្នុងការបំពេញតួនាទី ភារកិច្ចប្រកបដោយស្មារតីទទួលខុសត្រូវខ្ពស់ ដើម្បីសម្រេចបាននូវសមិទ្ធផលជាច្រើនគួរឱ្យកត់សម្គាល់ ជាពិសេសក្នុងការធានាថែរក្សាសន្តិភាព ស្ថិរភាពនយោបាយ ការរក្សាសន្តិសុខ សណ្តាប់ធ្នាប់សាធារណៈ ការលើកកម្ពស់លទ្ធិប្រជាធិបតេយ្យ ជាពិសេសការរួមចំណែកយ៉ាងសកម្ម ក្នុងការដោះស្រាយបញ្ហាជនភៀសសឹក។ ឈរលើមូលដ្ឋានដើម្បីបន្តរួមចំណែកជាមួយរាជរដ្ឋាភិបាល ក្នុងការពង្រឹងនិងលើកកម្ពស់ការគ្រប់គ្រង និងការដឹកនាំកិច្ចការរដ្ឋបាល សន្តិសុខ សណ្តាប់ធ្នាប់សាធារណៈ ជាពិសេសបន្ត ជំរុញការកសាងភាពធន់ និងអភិវឌ្ឍមូលដ្ឋានឱ្យកាន់តែមានការរីកចម្រើនសម្រេចបាននូវសមិទ្ធផល ថ្មីៗបន្ថែមទៀត ឯកឧត្តម រដ្ឋលេខាធិការ ក៏បានផ្តល់នូវគោលការណ៍ណែនាំលើកិច្ចការអាទិភាពសំខាន់ៗមួយចំនួនដូចជា ៖ ១–ការបន្តថែរក្សា និងពង្រឹងសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម, ២–ការលើកកម្ពស់ ការថែរក្សា ការការពារបូរណភាពទឹកដី និងអធិបតេយ្យជាតិ, ៣–ការអនុវត្តកម្មវិធីកំណែទម្រង់វិមជ្ឈការ និងវិសហមជ្ឈការ, ៤–ការអភិវឌ្ឍសេដ្ឋកិច្ច–សង្គម, ៥–ការផ្តល់សេវាសាធារណៈ និងដោះស្រាយសំណូមពររបស់ប្រជាពលរដ្ឋ និងទី៦–ពង្រឹងរបៀបរបបការងារ។
សូមបញ្ជាក់ថា ៖ យោងតាមច្បាប់ស្តីពីការគ្រប់គ្រងរដ្ឋបាលរាជធានី–ខេត្ត ក្រុង–ស្រុក ខណ្ឌ លក្ខណសម្បត្តិសមត្ថភាព និងបទពិសោធការងារកន្លងមក និងសំណូមពរចាំបាច់រាជរដ្ឋាភិបាល បានសម្រេចផ្ទេរភារកិច្ចលោកស្រី មុំ ពុទ្ធីតា ពីអភិបាលរងខេត្តឧត្តរមានជ័យ មកជាអភិបាលរង នៃគណៈអភិបាលខេត្តបន្ទាយមានជ័យ ជំនួសលោកស្រី រស់ សុផានី អភិបាលរងខេត្តបន្ទាយមានជ័យ ដែលដល់អាណត្តិ ៨ឆ្នាំ៕
