ខេត្តបន្ទាយមានជ័យ៖បន្តផ្សព្វផ្សាយ អនុវត្តច្បាប់ដែលពាក់ព័ន្ធនឹងការជួញដូរមនុស្សឲ្យបានទូលំទូលាយដល់សហគមន៍មូលដ្ឋាន។ លោកស្រី រស់ សុផានី អភិបាលរង ខេត្តបន្ទាយមានជ័យ និងជាប្រធានលេខាធិការដ្ឋាននៃគណៈកម្មាធិការប្រយុទ្ធប្រឆាំងជួញ ដូរមនុស្សខេត្តបន្ទាយមានជ័យ មានប្រសាសន៍បែបនេះក្នុងកិច្ចប្រជុំបូកសរុបលទ្ធផលការងារប្រចាំខែឧសភា ឆ្នាំ២០២៦ នាថ្ងៃសុក្រ ថ្ងៃទី៥ ខែមិថុនា ឆ្នាំ២០២៦ ។
លោកស្រី រស់ សុផានី បានមានប្រសាសន៍ថា លទ្ធផលនៃអំពើជួញដូរមនុស្ស កន្លងមកមានលក្ខណៈល្អប្រសើរ ដោយអាជ្ញាធរគ្រប់លំដាប់ថ្នាក់ សមត្ថកិច្ចពាក់ព័ន្ធ បានយកចិត្តទុកដាក់ទទួលខុសត្រូវខ្ពស់ ក្នុងការអនុវត្តគោលនយោបាយភូមិឃុំមានសុវត្ថិភាពនិងការបង្ការបង្ក្រាបនិងទប់ស្កាត់បទល្មើសផ្សេងផ្សេងពិសេសការជួញដូរមនុស្ស ការប្រើប្រាស់គ្រឿងញៀន និងអំពើហិង្សាក្នុងគ្រួសារជាដើម។
លោកស្រី បន្តថាគណៈកម្មាធិការ ប្រយុទ្ធប្រឆាំងការជួញដូរមនុស្សថ្នាក់ខេត្ត ជានិច្ចកាលតែងតែបានសហការជាមួយសមត្ថកិច្ចគ្រប់អង្គភាពអាជ្ញាធរមូលដ្ឋាននិងជាមួយអង្គការដៃគូនានា ដើម្បីបង្កើននៃការទប់ស្កាត់ ព្រមទាំងបង្កើនការផ្សព្វផ្សាយ តាមគ្រប់រូបភាពក្នុងន័យធានាបាននូវការចំណាកស្រុកប្រកបដោយ សុវត្ថិភាព ការទប់ស្កាត់ការជួញដូរមនុស្សដោយខុសច្បាប់ អាជីវកម្មផ្លូវភេទ និងការប្រើប្រាស់ពលកម្មកុមារនៅតាមទីកន្លែងនានាដូចជា តាមសហគ្រាស រោងចក្រផលិតកម្ម ការដ្ឋានសំណង់ អាចងាយនឹងរងគ្រោះដោយបញ្ហាសុខភាព ដោយការងារធ្ងន់ធ្ងរម្យ៉ាងវិញទៀតធ្វើឲ្យកុមារ ពុំបានសិក្សារៀនសូត្រ។ ដូច្នេះហើយ យើងទាំងអស់គ្នា លើកទិសដៅបន្តសហការ កងកម្លាំងប្រដាប់អាវុធ អាជ្ញាធរគ្រប់លំដាប់ថ្នាក់ រួបគ្នាទប់ស្កាត់ ការលួចឆ្លងដែនខុសច្បាប់ បន្តពង្រឹងគ្រប់គ្រងស្រាវជ្រាវតាមមូលដ្ឋាន រកមុខសញ្ញាមេខ្យល់ បន្តការសហការទំនាក់ទំនងជាមួយអង្គការដៃគូដែលពាក់ព័ន្ធ ឲ្យបានប្រសើរបន្ថែមទៀត៕
