(បន្ទាយមានជ័យ)៖នាព្រឹកថ្ងៃសុក្រ ទី២៣ ខែមករា ឆ្នាំ២០២៦ នៅអនុវិទ្យាល័យព្រះនេព្រះ មន្ទីរអធិការកិច្ចខេត្តបន្ទាយមានជ័យ បានរៀបចំពិធីផ្សព្វផ្សាយច្បាប់ស្ដីពីច្បាប់ចរាចរណ៍ផ្លូវគោក ជូនដល់សិស្សានុសិស្ស ក្រោមវត្តមានលោក ឯម នី អនុប្រធានមន្ទីរអធិការកិច្ចខេត្តបន្ទាយមានជ័យ ដោយមានការចូលរួមពីលោក ភុក តិច ប្រធានការិយាល័យអប់រំស្រុកព្រះនេត្រព្រះ លោកគ្រូ អ្នកគ្រូសិស្សានុសិស្សចូលរួមប្រមាណជាង២៩០នាក់ ស្ថិតក្នុងឃុំព្រះនេត្រព្រះ ស្រុកព្រះនេត្រព្រះ ខេត្តបន្ទាយមានជ័យ។
លោក ឈឿង កែល ប្រធានការិយាល័យរដ្ឋបាល និងលោកស្រី ឆែប សំឡី ប្រធានការិយាល័យដោះស្រាយបណ្ដឹង បានឡើងធ្វើបទបង្ហាញច្បាប់ស្ដីពីចរាចរណ៍ភ្លើងគោកពីជំពូកនៃបទប្បញ្ញត្តិទូទៅទាំង ១២ជំពូក និង៩២មាត្រា បង្ហាញពីស្លាកសញ្ញាចរាចរណ៍ជូនដល់សិស្សានុសិស្សបានដឹង បានយល់ បានស្គាល់ ពីសុវត្ថិភាពចរាចរណ៍ផ្លូវគោក។
លោក ភុក តិច ប្រធានការិយាល័យអប់រំស្រុកព្រះនេត្រព្រះ បានមានមតិលើកឡើងថា៖ ពេលនេះគឺពិតជាមានសារៈសំខាន់ណាស់ ដើម្បីចូលរួមអនុវត្តនិងពង្រឹងច្បាប់ស្ដីពីចរាចរណ៍ផ្លូវគោកឲ្យកាន់តែទូលំទូលាយ។ជាពិសេសឱ្យមហាជន និងសមីខ្លួនអ្នកបើកបរត្រូវចូលរួមគោរពច្បាប់ទាំងអស់គ្នា។ជាក់ស្ដែងជូនដល់សិស្សានុសិស្សអនុវិទ្យាល័យព្រះនេព្រះនាពេលនេះ។
លោក ភុក តិច បានធ្វើការថ្លែងអំណរគុណ និងកោតសរសើរចំពោះការយកចិត្តទុកដាក់ខ្ពស់ពីមន្ទីរអធិការកិច្ចខេត្តបន្ទាយមានជ័យដែលបានរៀបចំបង្កើតឲ្យមានកម្មវិធីនេះឡើង។
លោក ឯម នី អនុប្រធានមន្ទីរអធិការកិច្ចខេត្តបន្ទាយមានជ័យ បានមានមតិលើកឡើងថា៖ ពិធីអប់រំផ្សព្វផ្សាយ ច្បាប់ស្ដីពីចរាចរណ៍ផ្លូវគោកសុវត្ថិភាពនាថ្ងៃនេះក្នុងគោលបំណងបង្ការនិងទប់ស្កាត់ការកើនទ្បើងនៃអត្រាគ្រោះថ្នាក់ និងលើកកម្ពស់ការយល់ដឹងផ្នែកច្បាប់ ការគោរព និងអនុវត្តច្បាប់ឱ្យបានត្រឹមត្រូវ ដើម្បីជាឧត្ដមប្រយោជន៍របស់សង្គមជាតិ។ជាមួយគ្នានោះលោក ក៏បានអំពាវនាវដល់លោកនាយក នាយករង លោកគ្រូ–អ្នកគ្រូបន្តផ្សព្វផ្សាយពីការអនុវត្តច្បាប់ចរាចរណ៍ផ្លូវគោកឱ្យបានទូលំទូលាយជូនដល់សិស្សានុសិស្សទាំងអស់ឱ្យបានយល់ដឹងអំពីច្បាប់បន្ថែមទៀត៕
