(បន្ទាយមានជ័យ) ដើម្បីជាការឆ្លើយតបតាមការសំណូមពរ ដែលជាតម្រូវការចាំបាច់ របស់វីរៈកងទ័ពឈរជើងជួរមុខ កាលពីថ្ងៃអាទិត្យ ទី១៧ ខែឧសភា ឆ្នាំ២០២៦នេះព្រះអង្គ ង៉ែត សម្ផស្ស ជំនួយការផ្ទាល់របស់ព្រះវិរៈមុន្នី វ៉ា ចិន្តា ព្រះមេគណខេត្តបន្ទាយមានជ័យ និងជាម្ចាស់អាស្រមវិបស្សនារាម ផ្លូវលេខ៧ ស្ថិតនៅក្នុងភូមិសូភី២ សង្កាត់កំពង់ស្វាយ ក្រុងសិរីសោភ័ណ រួមជាមួយសប្បុរសជន បាននិមន្ត និងអញ្ជើញនាំយកបន្លែផ្លែឈើចម្រុះ ប្រមាណជាង ២តោន ទឹកសុទ្ធជាង១០០០យួរ តង់ ទឹកសុទ្ធ ទឹកត្រី ទឹកស៊ីអ៊ីវ ប្រហុក ធូបមូស មី ស្ករស ប៊ីចេង កាហ្វេ សាប៊ូ អង្ករ ដែលបានមកពីការនិមន្តបិណ្ឌបាត កៀរគរពីសប្បុរសជន ពីទីជិត ទីឆ្ងាយ ក្នុងស្រុក និងក្រៅស្រុក បានយកទៅចែកជូនដល់បងប្អូនវីរៈកងទ័ព ដែលឈរជើងជួរមុខ នៅទិសអូរស្មាច់ ខេត្តឧត្តរមានជ័យ ដោយផ្ទាល់។
ព្រះអង្គ ង៉ែត សម្ផស្ស បានមានសង់ដីការថ្លែងអំណរអរគុណដល់សប្បុរសជន ពីទីជិត ទីឆ្ងាយ ក្នុងស្រុក និងក្រៅស្រុក។ជាពិសេសញោមៗដែលជាអាជីវករនៅក្នុងផ្សារពូពុយក្នុងខេត្តបាត់ដំបង ដែលតែងតែប្រគេនបន្លែជាច្រើនតោន និងសម្ភារៈជាគ្រឿងឧបភោគ បរិភោគច្រើនមុខ ក្នុងការជួយឧបត្ថម្ភគាំទ្រដល់វីរៈកងទ័ពដែលឈរជើងនៅជួរមុខនាពេលនេះ។
ទន្ទឹមជាមួយគ្នានោះព្រះអង្គ ង៉ែត សម្ផស្ស បានសង់ដីការបញ្ជាក់ថា៖ ការប្រគល់ជូននាពេលនេះ គឺដើម្បីជួយសម្រាលទុកដល់ថ្នាក់ដឹកនាំ ហើយក៏ជាផ្នែកមួយដែលយើងមិនអាចភ្លេចបានក្នុងការជួយគាំទ្រវីរៈកងទ័ពឈរជើងជួរមុខ និងក៏ដូចជាការជួយសម្រាលបន្ទុកបានមួយគ្រា។ ម្យ៉ាងវិញទៀតសកម្មភាពនេះទាំងពុទ្ធចក្រ និងអាណាចក្រ បានឆ្លុះបញ្ចាំងអោយឃើញពីសមានចិត្តដ៏ប្រពៃថ្លៃថ្លា និងការរួបរួមសាមគ្គីគ្នា ក្នុងស្មារតីខ្មែរជួយខ្មែរ ខ្មែរស្រឡាញ់ខ្មែរ ដើម្បីរួមចំណែកជាមួយរាជរដ្ឋាភិបាល៕
