បន្ទាយមានជ័យ៖ ឯកឧត្តម ឃួន ដាវិត អនុប្រធានគណៈកម្មាធិការគណបក្ស អ.រ.ស និងជាប្រធានយុវជនគណបក្ស នៃអគ្គលេខាធិការដ្ឋានរដ្ឋសភា លោក ឃ្លោក នួយ អភិបាលរង ខេត្ត តំណាងឲ្យឯកឧត្តម អ៊ុំ រាត្រី អភិបាល នៃគណៈអភិបាលខេត្ត បានអញ្ជើញជាធិបតីភាព ក្នុងកម្មវិធីលើកកម្ពស់ជីវភាព បរិស្ថាន និងការប្រឹក្សាយោបល់ជាមួយជនភៀសសឹក និងចុះធ្វើសកម្មភាពមនុស្សធម៌ ចែកអំណោយ ថវិកា ពូជដំណាំ បន្លែបង្ការ ចាំបាច់មួយចំនួន ដើម្បីបំពេញតម្រូវការ ហ្នឹងសម្រាលការលំបាករបស់ប្រជាពលរដ្ឋភៀសសឹក ដែលមានស្ថានភាពលំបាក និងងាយរងគ្រោះ មានពិការភាព កំពុងស្នាក់នៅបណ្ដោះអាសន្ន (ផ្ទះអតីតយុទ្ធជន) ដោយមានការចូលរួមពី ប្រតិភូអមដំណើរ អភិបាលរងស្រុក និងអាជ្ញាធរមូលដ្ឋាន ស្ថិតនៅភូមិស្លក្រាម ឃុំស្លក្រាម ស្រុកស្វាយចេក ខេត្តបន្ទាយមានជ័យ នារសៀលថ្ងៃទី១៤ ខែឧសភា ឆ្នាំ២០២៦។
លោក ឃ្លោក នួយ អភិបាលរងខេត្ត បានថ្លែងអំណរគុណយ៉ាងជ្រៀតជ្រៅ ជូនចំពោះឯកឧត្តម ឃួន ដាវិត និងក្រុមយុវជនគណបក្សអគ្គលេខាធិការដ្ឋានរដ្ឋសភាទាំងអស់ ដែលបានអញ្ជើញនាំយកអំណោយមនុស្សធម៌ជាច្រើន មកចែកជូនបងប្អូនប្រជាពលរដ្ឋភៀសសឹក និងបានសម្រាកមួយយប់ ជាមួយពលរដ្ឋដើម្បីស្វែងយល់ពីតម្រូវការ និងសុខទុក្ខរបស់ពលរដ្ឋផ្ទាល់តែម្ដង។
នាក្នុងឱកាសនោះ ឯកឧត្តម ឃួន ដាវិត បានពាំនាំនូវការផ្តាំផ្ញើសួរសុខទុក្ខពីសំណាក់ សម្ដេចអគ្គមហាសេនាបតីតេជោ ហ៊ុន សែន សម្តេចមហាបវរធិបតី ហ៊ុន ម៉ាណែត និងសម្តេចមហារដ្ឋសភាធិការធិបតី ឃួន សុដារី សមាជិកអចិន្ត្រៃយ៍នៃគណៈកម្មាធិការកណ្តាលគណបក្សប្រជាជនកម្ពុជា និងជាប្រធានរដ្ឋសភា ជូនចំពោះ ឯកឧត្តម លោកជំទាវ លោក លោកស្រី បងប្អូនទាំងអស់ ដែលមានវត្តមានក្នុងអង្គពិធីទាំងមូល។ ថ្នាក់ដឹកនាំទាំងអស់ តែងតែគិតគូរ និងខ្វល់ខ្វាយជាប់ជានិច្ចពីសុខទុក្ខ និងការរស់នៅរបស់បងប្អូនប្រជាពលរដ្ឋទាំងអស់។
គួរបញ្ជាក់ថា អំណោយសម្រាប់បងប្អូនជនភៀសឹក ជាជនពិការចំនួន ២០៣គ្រួសារ ក្នុងមួយគ្រួសារៗទទួលបានរួមមាន៖ ដើមស្វាយ ២ដើម ដើមចេក ១ដើម ដើមល្ហុង ២ដើម ដើមក្រូចឆ្មា ២ដើម ដើមម្កាក់ ២ដើម ដើមម្ទេស ២ដើម ដើមត្រប់ ២ដើម ស្លឹកគ្រៃ ០.៥០គីឡូក្រាម ដើមល្មុត ១ដើម ដើមត្របែក ១ដើម ដើមជម្ពូរ ១ដើម ដើមម្ដិញ ១ដើម ដើមត្រឡឹងតឹង ១ដើម ដើមស្ដៅ ១ដើម ដើមមៀន ១ដើម និងប្រភេទគ្រាប់ពូជរួមមាន៖ គ្រាប់ល្ពៅ គ្រាប់ត្រកួន គ្រាប់ត្រប់ គ្រាប់ម្ទេស គ្រាប់ជី និងថវិកាមួយចំនួនផងដែរ៕
