ខេត្តបន្ទាយមានជ័យ៖ដោយអនុវត្តតាមបទបញ្ជារបស់លោកឧត្តមសេនីយ៍ត្រី សឿម សារិទ្ធ ស្នងការ នៃស្នងការដ្ឋាននគរបាលខេត្តបន្ទាយមានជ័យ និងមានការសម្របសម្រួលនិតិវិធីពីឯកឧត្តម កើត វណ្ណារ៉េត ព្រះរាជអាជ្ញា នៃអយ្យការអមសាលាដំបូងខេត្តបន្ទាយមានជ័យ នៅថ្ងៃទី១៣ ខែឧសភា ឆ្នាំ២០២៦ វេលាម៉ោង២០និង៥០នាទី កម្លាំងការិយាល័យជំនាញដឹកនាំដោយលោកឧត្តមសេនីយ៍ត្រី ធិន ស៊ិនដេត ស្នងការរងនគរបាលប្រឆាំងគ្រឿងញៀនខេត្ត បានឆ្មក់បង្ក្រាបករណីចែកចាយ និងប្រើប្រាស់ដោយខុសច្បាប់នូវសារធាតុញៀន នៅចំណុចមុខខារ៉ាអូខេ ពេជ្ជរ៉ា-PECHRA ស្ថិតក្នុងភូមិបាលិលេយ្យ២ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ដោយឃាត់ខ្លួនជនសង្ស័យបានចំនួន១នាក់ មានឈ្មោះ អ៊ឹង អៀងផេង ភេទប្រុស អាយុ ៣៥ឆ្នាំ ជនជាតិខ្មែរ។
វត្ថុតាងដកហូតបានរួមមានៈ ថ្នាំកញ្ចប់ពណ៌ខៀវរូបសះ PORSCHE ចំនួន២កញ្ចប់–ថ្នាំកញ្ចប់រូបនាគពណ៌មាស PORSCHE ១កញ្ចប់និងទូរស័ព្ទដៃ ១គ្រឿង ។
បន្ទាប់ពីបានទទួលចម្លើយសារភាពរបស់ឈ្មោះ អ៊ឹង អៀងផេង រួចមកនៅវេលាម៉ោង២១និង២០នាទី កម្លាំងសមត្ថកិច្ចបានបន្តនាំខ្លួនឈ្មោះ ពេជ្រ ពិសី ភេទប្រុស អាយុ៣០ឆ្នាំ ជនជាតិខ្មែរ នៅបន្ទប់ខារ៉ាអូខេ VIP លេខ.៣ (ជាន់ទី១) ។វត្ថុតាងចាប់យករួមមាន ថ្នាំកញ្ចប់ពណ៌ខៀវរូបសេះ PORSCHE ចំនួន ៤កញ្ចប់ –ថ្នាំកញ្ចប់ពណ៌ខ្មៅ PURBERRY ១កញ្ចប់ –ថ្នាំគ្រាប់ពណ៌ផ្កាឈូក (ប្រភេទគ្រវី) ចំនួន៦៥គ្រាប់ និងទូរស័ព្ទដៃ ១គ្រឿងផងដែរ។
បច្ចុប្បន្នជនសង្ស័យទាំង២នាក់ខាងលើ ត្រូវបានការិយាល័យជំនាញកសាងសំណុំរឿង បញ្ជូនទៅតុលាការ ដើម្បីអនុវត្តតាមនីតិវិធី ៕
