(បន្ទាយមានជ័យ) ដោយមានការចង្អុលបង្ហាញពីឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ នៅរសៀលថ្ងៃអង្គារ៍ ទី១២ ខែឧសភា ឆ្នាំ២០២៦នេះលោក ទូច ស៊ីផាត អគ្គនាយករង រដ្ឋបាល និងហិរញ្ញវត្ថុ និងជាប្រធានគ្រប់គ្រងគម្រោងគាំទ្រនិរន្តរភាពហេដ្ឋារចនាសម្ព័ន្ធជនបទ ដើម្បីទីផ្សារកសិករ និងពាណិជ្ជូបនីយកម្មកសិកម្ម (SAAMBAT) អមដំណើរដោយលោក យូ ហួត អនុប្រធានមន្ទីរអភិវឌ្ឍន៍ជនបទខេត្ត តំណាងលោក ជា យុទ្ធារុណ ប្រធានមន្ទីរអភិវឌ្ឍន៍ជនបទខេត្តបន្ទាយមានជ័យ ព្រមទាំងតំណាងក្រុមហ៊ុនសាងសង់ និងក្រុមការងារបានអញ្ជើញចុះពិនិត្យវឌ្ឍនភាពការងារលើកកម្រិតផ្លូវជនបទក្រាលកៅស៊ូ២ជាន់(DBST) និងបេតុង ចំនួន៣ខ្សែ ប្រវែង២៨.៨២គម នៅស្រុកព្រះនេត្រព្រះ និងស្រុកស្វាយចេក ក្នុងខេត្តបន្ទាយមានជ័យ។
លោក យូ ហួត អនុប្រធានមន្ទីរអភិវឌ្ឍន៍ជនបទខេត្ត បានមានប្រសាសន៍លើកឡើងថា៖ ការចុះពិនិត្យវឌ្ឍនភាពការងារលើកកម្រិតផ្លូវជនបទក្រាលកៅស៊ូ២ជាន់(DBST) និងបេតុង ចំនួន៣ខ្សែ ដែលមានប្រវែង២៨.៨២គម លូគ្រប់ប្រភេទ៥៧កន្លែង និងស្ពានបេតុង១កន្លែងប្រវែង៣៦ម៉ែត្រ ក្នុងក្របខណ្ឌគម្រោងគាំទ្រនិរន្តរភាពហេដ្ឋារចនាសម្ព័ន្ធជនបទ ដើម្បីទីផ្សារកសិករ និងពាណិជ្ជូបនីយកម្មកសិកម្ម (SAAMBAT) នៅស្រុកព្រះនេត្រព្រះ និងស្រុកស្វាយចេក…
១–ខ្សែទី១ផ្លូវជ្រាប់ចាស់–ជ្រាប់ថ្មី ប្រវែង១២.៦៥គ.ម និងលូរំដោះទឹកគ្រប់ប្រភេទចំនួន២៧កន្លែងក្នុងឃុំជប់វ៉ារី ស្រុកព្រះនេត្រព្រះ។
២–ខ្សែទី២ ផ្លូវ កក់–ភាសត្បូង ប្រវែង១២. ៤៦គ .ម និងលូរំដោះទឹកគ្រប់ប្រភេទចំនួន១៣កន្លែង ចាប់ពីឃុជប់វ៉ារី កាត់តាមឃុំបុស្បូវ ស្រុកព្រះនេត្រព្រះ ទៅដល់ឃុំសារង្គ ស្រុកស្វាយចេក។
៣–ខ្សែផ្លូវទី៣ ផ្លូវតាដួល ប្រវែង៣ .៧១គ.ម និងលូរំដោះទឹកគ្រប់ប្រភេទចំនួន១៧កន្លែងក្នុងឃុំផ្គាំ ស្រុកស្វាយចេក។
ក្នុងការចុះពិនិត្យនោះលោក ទូច ស៊ីផាត បានមានប្រសាសន៍លើកឡើងថា៖ ក្នុងអាណត្តិទី ៧នេះដែលដឹកនាំដោយសម្ដេចបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ជាអ្នកបន្តវេនពីសម្ដេចតេជោ ហ៊ុន សែន បាននឹងកំពុងខិតខំបន្តអភិវឌ្ឍប្រទេសជាតិលើគ្រប់វិស័យ ជាពិសេសអភិវឌ្ឍផ្លូវជនបទដោយក្រាលកៅស៊ូពីរជាន់ និងបេតុង ជាបន្តបន្ទាប់ដើម្បីឲ្យមានភាពធន់ក្នុងការបម្រើផលប្រយោជន៍របស់ប្រជាជននៅតាមជនបទ ស្របតាមយុទ្ធសាស្ត្របញ្ចកោណរបស់រាជរដ្ឋាភិបាល។
លោកបានបញ្ជាក់ថា៖ រាជរដ្ឋាភិបាលបានពុះពារគ្រប់ឧបសគ្គដើម្បីការពារ និងអភិវឌ្ឍប្រទេសជាតិ។ ដូច្នេះសូមឱ្យបងប្អូនប្រជាពលរដ្ឋ លោកយាយ លោកតា បងប្អូន កូនក្មួយ ទាំងអស់ត្រូវមានជំនឿលើរាជរដ្ឋាភិបាល ជាពិសេស ជឿទុកចិត្តលើ សម្ដេចមហាបវរធិបតី នាយករដ្ឋមន្ត្រី ក្នុងការដឹកនាំ ប្រទេសជាតិឲ្យកាន់តែរីកចម្រើនទៅអនាគត។
ទន្ទឹមជាមួយគ្នានោះលោក អគ្គនាយករងរដ្ឋបាល និងហិរញ្ញវត្ថុ និងជាប្រធានគ្រប់គ្រងគម្រោងគាំទ្រនិរន្តរភាពហេដ្ឋារចនាសម្ព័ន្ធជនបទ ដើម្បីទីផ្សារកសិករ និងពាណិជ្ជូបនីយកម្មកសិកម្ម (SAAMBAT) បានធ្វើការណែនាំដល់ម្ចាស់ក្រុមហ៊ុនទទួលការសាងសង់ត្រូវយកចិត្តទុកដាក់ឲ្យបានខ្ពស់ក្នុងការអនុវត្តការងារឲ្យសម្រេចលទ្ធផលតាមផែនការ ដោយធានាឲ្យបាននូវសោភ័ណភាព និងគុណភាពតាមបទដ្ឋានបច្ចេកទេស ព្រមទាំងមានភាពធន់និងការប្រែប្រួលអាកាសធាតុ ក្នុងការប្រើប្រាស់រួមនៅក្នុងភូមិ ឃុំ ស្រុករបស់យើងទាំងអស់គ្នាបានយូរអង្វែង។និងបានធ្វើការសំណូមពរដល់អាជ្ញាធរមូលដ្ឋាន បងប្អូនប្រជាពលរដ្ឋសងខាងផ្លូវសូមចូលរួមសហការ ជាមួយក្រុមហ៊ុនសាងសង់ និងក្រុមការងារក្នុងការចុះអនុវត្ត ក៏ដូចជាអ្នកប្រើប្រាស់សូមជួយថែទាំផ្លូវនេះឱ្យបានដិតដល់ដើម្បីធានាថាផ្លូវនេះអាចប្រើប្រាស់បានយូរអង្វែង និងបម្រើផលប្រយោជន៍ជូនប្រជាពលរដ្ឋយើងនៅមូលដ្ឋានផងដែរ៕
