(បន្ទាយមានជ័យ) យ៉ាងហោចណាស់មានមនុស្សចំនួនបីនាក់ បានបាត់បង់ជីវិតក្នុងហេតុការណ៍គ្រោះថ្នាក់ចរាចរណ៍ដ៏រន្ធត់រវាងម៉ូតូនិងរថយន្ត នៅវេលាម៉ោង០៨:០០នាទីព្រឹកថ្ងៃទី០៣ ឧសភា ឆ្នាំ២០២៦ លើផ្លូវជាតិលេខ៥ ក្នុងទីប្រជុំជន ត្រង់ចំណុចមុខសាលាបឋមសិក្សា សាលាក្រហម ស្ថិតនៅក្នុងភូមិសូរិយា ឃុំកូប ស្រុកអូរជ្រៅ ខេត្តបន្ទាយមានជ័យ ។
សមត្ថកិច្ចបានឲ្យដឹងថា ករណីគ្រោះថ្នាក់ចរាចរណ៍នេះគឺកើតឡើងរវាងម៉ូតូម៉ាកHONDA DREAM ពណ៌ខ្មៅ ពាក់ផ្លាកលេខ សៀមរាប1AQ-2998 បើកបរដោយ:ឈ្មោះ ឆាយ ដាវីន ភេទប្រុស អាយុ ១៩ ឆ្នាំមានទីលំនៅភូមិ គោកចារ ឃុំស្ពានស្រែង ស្រុកភ្នំស្រុក ខេត្តបន្ទាយមានជ័យ និងមានអ្នករូមដំណើរ០២នាក់
១/ ឈ្មោះ ឆាយ សាវុធ ភេទប្រុស អាយុ ១៦ ឆ្នាំ ត្រូវជាប្អូនរបស់អ្នកបើកបរ
២/ឈ្មោះ ជ្រឹម រក្សា ភេទប្រុស អាយុ ១៧ ឆ្នាំ មានទីលំនៅភូមិគោកត្រាំ ឃុំស្រណាល ស្រុកក្រឡាញ់ ខេត្តសៀមរាប បើកបរក្នុងទិសដៅពីលិចទៅកើត លុះដល់កន្លែងកើតហេតុខាងលើបានគេចពីរថយន្ត(ក្តាប់ភិនភានមិនបាន)ក្នុងទិសដៅច្រាស់គ្នាដែលកំពុងត្រៀមប្ដូរគន្លងបត់ឆ្វេង ដោយមានល្បឿនលឿន ក៏ជ្រុលចង្កូតទៅបុករថយន្ត០១គ្រឿងម៉ាក RANGE ROVER ពណ៌ប្រផេះ ពាក់ផ្លាកលេខ ភ្នំពេញ2AZ-8555 បើកបរដោយឈ្មោះ សូ សារួម ភេទប្រុស អាយុ៤០ឆ្នាំ រស់នៅភូមិភ្នំធំត្បូង ឃុំអូរប្រាសាទ ស្រុកមង្គលបូរី ខេត្តបន្ទាយមានជ័យ បើកបរក្នុងទិសដៅពីកើតទៅលិចដែលកំពុងបើកបរខាងស្ដាំដៃរបស់ខ្លួន ចំពីមុខពេញទំហឹងបណ្ដាលឲ្យកើតមានគ្រោះថ្នាក់តែម្ដង។
សមត្ថកិច្ចបញ្ជាក់ថា អ្នកបើកបរនិងរួមអ្នកធ្វើដំណើរម៉ូតូ សរុប៣នាក់បានស្លាប់ ដោយឡែកសម្ភារៈរថយន្តខូចខាតធ្ងន់០១គ្រឿង និងម៉ូតូខូចខាតធ្ងន់០១គ្រឿង នគរបាលចរាចរណ៍ធ្វើការវាស់វែងរួចនាំទៅការិយាល័យនគរបាលចរាចរណ៍ផ្លូវគោកដើម្បីអនុវត្តច្បាប់តាមនីតិវិធី។ដោយឡែកសាកសពត្រូវបានប្រគល់ជូនក្រុមគ្រួសារយើងទៅធ្វើបុណ្យតាមប្រពៃណីខ្មែរ៕
