បន្ទាយមានជ័យ៖ អាជ្ញាធរជាតិប្រយុទ្ធនឹងជំងឺអេដស៍ បានរៀបចំកិច្ចប្រជុំ គណៈកម្មាធិការ ប្រយុទ្ធប្រឆាំង នឹងជំងឺអេដស៍ខេត្ត ស្តីពីផ្សព្វផ្សាយជំរុញការប្រើប្រាស់ស្រោមអនាម័យក្នុងខេត្តបន្ទាយមានជ័យ ឱ្យបាន១០០% ។កិច្ចប្រជុំនេះបានប្រារព្ធធ្វើឡើង នាព្រឹកថ្ងៃទី២៨ ខែមេសា ឆ្នាំ២០២៦ នៅសាលក្រុមប្រឹក្សាខេត្ត ក្រោមអធិបតីភាព ឯកឧត្ដម ទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ និងមានការអញ្ជើញចូលរួមប្រតិភូអន្តរក្រសួង ឯកឧត្ដម អ៊ុំរាត្រី អភិបាល នៃគណៈអភិបាលខេត្ត ព្រមទាំងលោក–លោកស្រី អ្នកពាក់ព័ន្ធផងដែរ។
ឯកឧត្ដម អ៊ុំ រាត្រី ក៏បានថ្លែងអំណរគុណ អាជ្ញាធរជាតិប្រយុទ្ធនឹងជំងឺអេដស៍ ជាពិសេសឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ ដែលរៀបចំកិច្ចប្រជុំ នេះដើម្បីជាធាតុចូលបន្ថែមទៀត ដើម្បីរួមគ្នាក្នុងចូលរួម ផ្សព្វផ្សាយ និងប្រយុទ្ធប្រឆាំងជំងឺអេដស៍ទូទាំងប្រទេស ក៏ដូចជាសម្រាប់ខេត្តបន្ទាយមានជ័យ។
ឯកឧត្ដម អភិបាល ខេត្ត ក៏បានបញ្ជាក់ថា ពាក់ព័ន្ធនឹងការបង្ការ–គ្រប់គ្រងជំងឺឆ្លងដែលផ្តោតលើការងារអេដស៍ និងកាមរោគនោះបានបង្ហាញឱ្យឃើញថា អត្រាការឆ្លងមេរោគអេដស៍នៅប្រទេសកម្ពុជាមាន០,៥% ហើយការប៉ាន់ប្រមាណអ្នកផ្ទុកមេរោគអេដស៍នៅក្នុងខេត្តបន្ទាយមានជ័យ មានប្រមាណ៤.៨៧៣នាក់នៅឆ្នាំ២០២២។ ឯកឧត្ដម បន្តថា ក្រុមដែលប្រឈមមុខខ្ពស់ រួមមាន៖ ស្រ្តីបំរើសេវាកំសាន្ត ក្រុមបុរសស្រឡាញ់បុរស ក្រុមបំលែងភេទ ដែលគ្រប់គ្រងដោយអង្គការរ៉ាក់ (RHAC) មានការអប់រំផ្តល់ប្រឹក្សានិងធ្វើតេស្តឈាម និងបញ្ជូនចូលសេវាព្យាបាលបានទាន់ពេលវេលាក្នុងករណីមានផ្ទុកមេរោគអេដស៍និងជំងឺស្វាយ។
ឯកឧត្ដម ទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ ក៏បានថ្លែងការអរគុណចំពោះតួអង្គពាក់ព័ន្ធ ដែលបានរួមចំណែកផ្សព្វផ្សាយ និងវិធានការពារជំងឺអេដស៍ដល់ក្រុមដែលប្រឈមមុខខ្ពស់ រួមមាន ស្រ្តីបំសេវាកំសាន្ត ក្រុមបុរសស្រឡាញ់បុរស ក្រុមបំលែងភេទ ជាដើម។
ឯកឧត្ដម ជំរុញណែនាំដល់ខេត្តបន្ទាយមានជ័យ ក៏ដូចជាខេត្តរាជ–ធានីខេត្តទាំងអស់ ត្រូវពង្រឹងលើការងារពហុវិស័យ ដោយត្រូវចាប់ផ្តើមពីអាជ្ញាធរខេត្ត រហូតទៅដល់ឃុំ–សង្កាត់ ដែលមានប្រជាជន រស់នៅ ពិសេសអ្នកផ្ទុកមេរោគអេដស៍ ដើម្បីធ្វើការអប់រំណែនាំពួកគាត់។ ត្រូវអប់រំផ្សព្វផ្សាយការបង្ការការចម្លងមេរោគអេដស៍ និងកាមរោគ (ដោយការប្រើប្រាស់ស្រោមអនាម័យត្រឹមត្រូវ១០០%), សហការជិតស្និទ្ធជាមួយក្រុមការងារ អាជ្ញាធរ អង្គការដៃគូពាក់ព័ន្ធ និងសម្របសម្រួល ដោះស្រាយរាល់ឧបសគ្គផ្សេងៗ, ជំរុញលើកទឹកចិត្តការធ្វើតេស្តឈាមដោយជោះចុងម្រាមដៃ និងការធ្វើតេស្តដោយខ្លួនឯងជាដើម៕
