បន្ទាយមានជ័យ ៖ ឯកឧត្ដម អ៊ុំ រាត្រី សមាជិកគណៈកម្មាធិការកណ្តាល នឹងជាប្រធានគណៈកម្មការ គណបក្សប្រជាជនកម្ពុជាខេត្តបន្ទាយមានជ័យ នាថ្ងៃទី២៦ ខែមេសា ឆ្នាំ ២០២៦ បានអញ្ជើញជាអធិបតីភាពក្នុងពិធីបិទវគ្គអប់រំនយោបាយរបស់គណបក្សប្រជាជនកម្ពុជាខេត្តបន្ទាយមានជ័យ ជំនាន់ទី១២ ជូនដល់សិក្ខាកាម គណបក្សប្រជាជនកម្ពុជាក្រុងប៉ោយប៉ែត ចំនួន១៣០នាក់ នៅទីស្នាក់ការគណៈកម្មាធិការគណបក្សក្រុងប៉ោយប៉ែត។
មានប្រសាសន៍ បិទវគ្គឯកឧត្ដម អ៊ុំ រាត្រី មានប្រសាសន៍ ថា គណបក្សប្រជាជនកម្ពុជា បានដឹកនាំប្រទេសរយៈពេលជាង៤០ឆ្នាំមកនេះបានកសាងស្នាដៃជាច្រើនដូចជា កសាងហេដ្ឋារចនាសម្ព័ន្ធប្រព័ន្ធ ជាច្រើន ដឹកនាំប្រទេសជាតិឱ្យមានការរីកចម្រើន អភិវឌ្ឍយ៉ាងឆាប់រហ័ស។ ហើយគណបក្សប្រជាជនកម្ពុជា ជាគណបក្សចាស់វស្សា បានឆ្លងកាត់រាល់ឧបសគ្គជាច្រើន បាននាំនាវាកម្ពុជាចេញពីភ្នក់ភ្លើងសង្គ្រាម រំដោះជាតិកម្ពុជា ចេញពីរបបដ៏ខ្មៅងងឹត រហូតប្រទេសជាតិមានសុខសន្តិភាព ប្រជាជនមានជីវភាពធូធារ។
ឯកឧត្ដម បន្តថា ក្នុងពេលដែលមានការឈ្លានពានពីសត្រូវប្រទេសជិតខាង គណបក្សប្រជាជនកម្ពុជា បានអនុវត្តបទឈប់បាញ់យ៉ាងពេញលេញ ដើម្បីការពារអាយុជីវិតរបស់បងប្អូនប្រជាពលរដ្ឋ ជាពិសេសវិរៈកងទ័ពដែលបានតស៊ូ ការពារទឹកដីពីការឈ្លានរបស់សត្រូវ។ រដ្ឋាភិបាល ក៏មិនបោះបង់ចោលឡើយតែងតែគិតគូរពីសុខទុក្ខរបស់ប្អូនប្រជាពលរដ្ឋ ពិសេសបងប្អូនភៀសសឹក រាជដ្ឋាភិបាលបានរៀបចំនូវជម្រកសមរម្យ ដើម្បីឱ្យបងប្អូនបានស្នាក់បណ្តោះអាសន្ន មានការផ្គត់ផ្គងស្បៀងជាប្រចាំ។
ឯកឧត្តម អ៊ុំ រាត្រី បន្តអំពាវនាវសិក្ខាកាម ពិសេសពលដ្ឋកម្ពុជាប្រជាពលរដ្ឋទូទាំងប្រទេស បន្តជឿជាក់លើរាជរដ្ឋាភិបាលក្នុងការដោះស្រាយបញ្ហាព្រំដែន រាជរដ្ឋាភិបាលបាននឹងកំពុងការស្វែងរកយុត្តិធម៌តាមច្បាប់ ទាមទារដែនអធិបតេយ្យរបស់កម្ពុជាមកវិញ ដើម្បីឱ្យស្ថានភាពនៅតាមបន្ទាត់ព្រំដែនវិលត្រឡប់មករកស្ថានភាពដើម ហើយបងប្អូនភៀសសឹកអានបានវិលទៅលំនៅឋានវិញ៕
