ខេត្តបន្ទាយមានជ័យ៖នៅព្រឹកថ្ងៃទី២៤ ខែមេសា ឆ្នាំ២០២៦ នៅពន្ធនាគារខេត្តបន្ទាយមានជ័យ បានបើកកិច្ចប្រជុំបន្ធូរបន្ថយទោស ដល់ទណ្ឌិតជាប់ឃុំចំនួន ៣អ្នកស្រី ១នាក់។ ក្នុងនោះមានសម្រាលទោស ៣ខែ និង៦ខែក្នុងឱកាសចូលឆ្នាំថ្មី ដោយតាមព្រះរាជក្រឹត្យលេខ នស/រកត/0426/478ចុះថ្ងៃទី១១ ខែមេសា ឆ្នាំ២០២៦។ ដែលពិធីនេះប្រព្រឹត្តទៅក្រោមអធិបតីភាព លោក លី សុវណ្ណារិទ្ធ អភិបាលរងខេត្ត តំណាងឯកឧត្តម អ៊ុំ រាត្រី អភិបាលខេត្ត លោក ទេព ឃុនឆ័យ ព្រះរាជអាជ្ញារងនៃអយ្យការអមសាលាដំបូងខេត្តតំណាង ឯកឧត្ដម កើត វណ្ណារ៉េតព្រះរាជអាជ្ញា នៃអយ្យការ អមសាលាតំបូងខេត្ត និងលោកឧត្តម អគ្គានុរក្សថ្នាក់លេខ២ អ៊ុង ស៊ីផានប្រធានពន្ធនាគារខេត្ត។
លោក ឆន ឈីន អនុប្រធានពន្ធនាគារខេត្តបានដឹងថា ពិធីប្រកាសព្រះរាជក្រឹត្យស្ដីពីការបន្ធូរបន្ថយទោសនិងលើកលែងទោសដល់ទណ្ឌិតនៅក្នុងឱកាសបុណ្យចូលឆ្នាំថ្មីប្រពៃណីជាតិ នៅក្នុងពន្ធនាគារខេត្តបន្ទាយមានជ័យត្រូវទទួលបានការ បន្ធូរបន្ថយទោសនិងលើកលែងទោសបានចំនួន៣នាក់ស្រី១នាក់ ក្នុងនោះបន្ធូរបន្ថយទោស៣ខែចំនួន២នាក់ និងបន្ធូរបន្ថយទោសរយៈពេល ដែលទទួលរងទោស៦ខែ ចំនួន១នាក់។
លោកទេព ឃុនឆ័យ ព្រះរាជអាជ្ញារង និងលោក លី សុវណ្ណារិទ្ធអភិបាលរងខេត្ត បានមានប្រសាសន៍កោតសរសើរដោយស្មោះចំពោះថ្នាក់ដឹកនាំ និងមន្ត្រីអង្គភាពពន្ធនាគារខេត្ត ដែលបានយកចិត្តទុកដាក់បំពេញភារៈកិច្ច ទទួលបានលទ្ធផលល្អប្រសើរចំពោះការគ្រប់គ្រង មើលការខុសត្រូវបង្ហាត់បង្រៀនមុខវិជ្ជាផ្សេងៗ ដល់ទណ្ឌិតពេលដែលបានរួចទោសវិញ គឺមានចំណេះជំនាញព្រមទាំងបានកែខ្លួនជាមនុស្សល្អឡើងវិញសម្រាប់បម្រើគ្រួសារនិងសង្គមជាតិ។ លោកអភិបាលរងខេត្តបានបន្តថាដំណើរការនៃការខិតខំប្រឹងប្រែង គ្រប់គ្រងថែរក្សាអប់រំ ដល់អ្នកជាប់ឃុំ ក្នុងនោះក៏បានធ្វើការពិនិត្យវាយតម្លៃលើសកម្មភាព នៃការអនុវត្តគុណសម្បត្តិ នៃការកែប្រែរបស់ទណ្ឌិត ធ្វើការវាយតម្លៃបន្ធូរបន្ថយទោស។
ចុងក្រោយ លោកអភិបាលរងខេត្តបានធ្វើការផ្តាំផ្ញើ ដល់ទណ្ឌិតទាំងអស់ក្រោយពីបានរួចទោសហើយនោះ ពេលដែលចេញពីពន្ធនាគារវិញត្រូវកែប្រែខ្លួនដើម្បីក្លាយខ្លួនទៅជាមនុស្សល្អពលរដ្ឋល្អ នៅក្នុងសង្គមជាតិ៕
