ខេត្តបន្ទាយមានជ័យ៖សមណ:សិស្ស សិស្ស សរុបចំនួន ៣២០អង្គ/នាក់ ត្រូវបានសាលាគណខេត្ត សហការជាមួយ មន្ទីរធម្មការនិងសាសនាខេត្តបន្ទាយមានជ័យ បានធ្វើការរៀបចំ និងការប្រឡងវិញ្ញាបនបត្រពុទ្ធិកបឋមសិក្សាបាលីរួងដំណាច់ឆ្នាំសិក្សា២០២៥-២០២៦ រយៈពេល២ថ្ងៃ ចាប់ពីថ្ងៃទី១៧ ដល់ ១៨ ខែមករា ឆ្នាំ២០២៦ នៅមណ្ឌលប្រឡងពុទ្ធិកវិទ្យាល័យសម្ដេចជាស៊ីម ហៅវត្តស្វាយចាស់ ស្ថិតនៅក្នុងសង្កាត់ព្រះពន្លា ក្រុងសិរីសោភ័ណ ។ពិធីនេះប្រព្រឹត្តទៅក្រោមអធិបតីភាពព្រះតេជគុណទាំងពីរគណៈ លោក យឹម សំណាង អភិបាលរង ខេត្ត តំណាង ឯកឧត្តម អ៊ុំ រាត្រី អភិបាលខេត្តបន្ទាយមានជ័យ។
លោក បៀវ ថាន ប្រធានមន្ទីរធម្មការនិងសាសនាខេត្តបានឲ្យដឹងថា សម្រាប់សមណសិស្ស សិស្សទាំង ៣២០អង្គ/នាក់នេះ ដែលត្រូវបានធ្វើការប្រឡងមានចំនួន ៦វិញ្ញាសាទី១ ភាសាបាលី ទី២ តែងសេចក្ដី ទី៣ ប្រវត្តិភូមិវិទ្យាសាស្ត្រអនុវត្ត ទី៤ ពុទ្ធវិន័យ ពុទ្ធប្រវត្តិសាសនា ទី៥ សរសេរតាមអាន និងទី៦ គណិតវិទ្យា។
លោក យឹម សំណាង បានថ្លែងនូវអំណរព្រះគុណ អរគុណចំពោះសាលាគណខេត្ត មន្ទីរធម្មការនិងសាសនាខេត្ត និងគណៈគ្រប់គ្រងសាលាពុទ្ធិកកំពុងសិក្សាសាស្ដ្រាចារ្យ លោកគ្រូអ្នកគ្រូដែលបានលះបង់អស់ពីកម្លាំងកាយចិត្តប្រាជ្ញាស្មារតីប្រកបដោយការទទួលខុសត្រូវខ្ពស់ មានសាមគ្គីភាពចំពោះភក្ដីភាពចូលរួម ការអភិវឌ្ឍមូលធនមនុស្សក្នុងវិស័យពុទ្ធិកសិក្សាជាមួយរាជរដ្ឋាភិបាលព្រោះថាវិស័យពុទ្ធិកសិក្សាគឺជា បេះដូងនិងសរសៃឈាមរបស់ព្រះពុទ្ធសាសនាដែលជាសាសនារបស់រដ្ឋនិងជាមូលដ្ឋានគ្រឹះដ៏សំខាន់នៅក្នុងការអភិវឌ្ឍសីលធម៌សង្គមប្រកបដោយចិរភាព។ ចុងក្រោយលោក យឹម សំណាង ក៏បានធ្វើការផ្ដាំផ្ញើ ដល់គ្រប់ភូមិសិក្សាត្រូវពង្រឹងគុណភាពអប់រំ និងធ្វើទំនើបកម្មនីតិវិធីនៃការបណ្តុះបណ្តាលឲ្យកាន់តែល្អប្រសើរបន្ថែមទៀត ដើម្បីឲ្យឆ្លើយតបទៅនឹងដំណើរវិវឌ្ឍន៍នៃវិស័យបច្ចេកវិទ្យាឌីជីថល ត្រូវធ្វើកំណែទម្រង់ការគ្រប់គ្រងពុទ្ធិកសិក្សាតាមបែបប្រពៃណី ទៅជាគ្រប់គ្រងតាម វិទ្យាសាស្ត្រទំនើបឌីជីថល ដែលអាចជួយឲ្យការអនុវត្តការងាររបស់ការសិក្សាប្រកបដោយប្រសិទ្ធភាព។ យ៉ាងណាមិញថ្ងៃនេះគឺជាថ្ងៃដែល ព្រះតេជព្រះគុណគ្រប់ព្រះអង្គនិមន្តមកប្រឡងក្នុងគោលបំណងវាស់ស្ទង់នូវសមត្ថភាព បានរៀនភាសាបាលីនិងមុខវិជ្ជាផ្សេងៗអស់រយៈពេលបីឆ្នាំកន្លងមកដូច្នេះការប្រឡងថ្ងៃនេះ ទោះបីជាទទួលបានលទ្ធផលបែបណាក៏ដោយ ក៏នៅតែបន្តខិតខំរៀនសូត្របន្ថែមទៀត តាមពាក្យស្លោកថា ការសិក្សា ពេញមួយជីវិត៕
