ខេត្តបន្ទាយមានជ័យ៖ប្រជាពលរដ្ឋភៀសសឹក ចំនួន ២៩៣៤គ្រួសារ ដែលបានរស់នៅបណ្ដោះអាសន្ន នៃជំរំជនភៀសសឹក ៣ទីតាំង ស្ថិតនៅក្នុងភូមិសាស្ត្រខេត្តបន្ទាយមានជ័យ ដោយទីតាំងទី១ នៅវត្ត ចាន់ស៊ីសាមគ្គីរតនារាម នៃភូមិកូបកើត ឃុំកូប ស្រុកអូរជ្រៅ ចំនួន៩៣១គ្រួសារ ទីតាំងទី២ នៅវត្តពោធិសូរិយារាម ឃុំកូប ស្រុកអូរជ្រៅ ចំនួន ៣១៧គ្រួសារ និងទីតាំងទី៣ ស្ថិតនៅវត្តកណ្ដោល ឃុំគោករមៀត ស្រុកថ្មពួកចំនួន ១៦៨៦គ្រួសារ ហើយប្រជាពលរដ្ឋភៀសសឹកទាំងអស់ត្រូវបានទទួលអំណោយមនុស្សធម៌ពីកាកបាទក្រហមកម្ពុជា នៅព្រឹកថ្ងៃទី៣ ខែមីនា ឆ្នាំ២០២៦ក្រោមអធិបតីភាព ឯកឧត្ដម យូ ឡាណា អគ្គលេខាធិការរងទី២ កាក់បាទក្រហមកម្ពុជា តំណាងដ៏ខ្ពង់ខ្ពស់សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា ព្រមទាំងមានការអញ្ជើញចូលរួមពីសំណាក់ ឯកឧត្តមទេសរដ្ឋមន្ត្រីកិត្តិសង្គហបណ្ឌិត គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ។
ឯកឧត្ដម យូឡាណា បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់ សម្តេចព្រះមហាក្សត្រី ព្រះវររាជមាតាជាតិខ្មែរ សម្ដេចម៉ែ សម្ដេចយាយ សម្ដេចយាយទួត ព្រះប្រធានកិត្តិយស កាកបាទក្រហមកម្ពុជា និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា
ដែលជានិច្ចកាល សម្តេចតែគិតគូរពីសុខទុក្ខរបស់បងប្អូនប្រជាពលរដ្ឋ ជាក់ស្តែងបងប្អូនប្រជាភៀសសឹកកំពុងស្នាក់នៅបណ្ដោះអាសន្នក្នុងជំរំនេះ។ ក្នុងនាមកាកបាទក្រហមកម្ពុជា ឯកឧត្ដមយូ ឡាណា ក៏បានធ្វើការចូលរួមសោកស្ដាយនៃការបាត់បង់ផ្ទះសម្បែងដីធ្លី ក៏ដូចជាការហ៊ុមព័ទ្ធរាយបន្លាលួសដាក់ទោសកុងតឺន័រ ធ្វើឲ្យប្រជាពលរដ្ឋមិនអាចចូលទៅរស់នៅបាន នេះគឺជាការឈ្លានពានរបស់យោធាសៀម ប៉ុន្តែរាជរដ្ឋាភិបាលបាននិងកំពុងបន្តខិតខំរកដំណោះស្រាយដោយសន្តិវិធី ។ ចុងក្រោយឯកឧត្តមបានធ្វើការផ្ដាំផ្ញើដល់បងប្អូនប្រជាពលរដ្ឋទាំងអស់ សូមរក្សាអនាម័យទឹកស្អាត ហូបស្អាតរស់នៅស្អាតដើម្បីសុខភាពល្អ។ អំណោយមនុស្សធម៌ ដែលបានផ្តល់ជូនក្នុងឱកាសនេះ ក្នុងមួយគ្រួសារទទួលបាន អង្ករ ៣០kg ត្រីខ ១យួរ ទឹកស៊ីអ៊ីវ១យួរ ទឹកត្រី១យួរ ប្រេងឆា១ដប ឆៃពៅ ១កែវ មុង១ ភួយ១ ក្រម៉ា១ សារុង១ និង ថវិកា១ចំនួន។ ដោយឡែក សម្រាប់ស្ត្រីមានផ្ទៃពោះចាស់ជរាជនពិការប្រតិភូកាកបាទក្រហម បានចុះផ្ដល់អំណោយនិងថវិកាជូនដល់ពួកគាត់ រស់នៅក្នុងតង់ផងដែរ៕
