បន្ទាយមានជ័យ៖ ប្រមុខរាជរដ្ឋាភិបាលកម្ពុជា សម្តេចមហាវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានសម្រេចសាងសង់ជម្រកបណ្តោះអាសន្នជូនបងប្អូនជនភៀសសឹក នៅក្នុងខេត្តបន្ទាយមានជ័យប្រមាណ៣០០០គ្រួសារ ដែលពួកគាត់មិនទាន់អាចវិលត្រលបទៅលំនៅឋានវិញបាន ដោយសារយោធាថៃបានដាក់កុងតឺន័រ និងរាយបន្លាលួសហ៊ុំព័ទ្ធបន្តគ្រប់គ្រងទាំងកម្រោល ក្នុងដែនអធិបតេយ្យភាពរបស់កម្ពុជា មានផ្ទះប្រជាពលរដ្ឋ មិនឱ្យពលរដ្ឋកម្ពុជាចូលរស់នៅឡើយ។
ជាមួយគ្នានោះឯកឧត្តមទេសរដ្ឋមន្ត្រី គន់ គីម អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ រួមនឹងនាយឧត្តមសេនីយ៍ ខេង សុមេធ ឯកឧត្ដម ឌិត ទីណា រដ្ឋមន្ត្រី ក្រសួង កសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ អមដំណើរ ដោយ ឯកឧត្តម អ៊ុំ រាត្រី អភិបាល នៃគណៈអភិបាលខេត្ត និងឯកឧត្តម ប្លែក វ៉ារី ប្រធានក្រុមប្រឹក្សាខេត្ត បានអញ្ជើញបញ្ចុះបឋមសិលាសម្រាប់សាងសង់ជម្រកបណ្តោះអាសន្ន នៅថ្ងៃទី១៤ ខែកុម្ភៈ ឆ្នាំ២០២៦ ។
ក្នុងឱកាស នោះឯកឧត្តមទេសរដ្ឋមន្ត្រី គន់ គីម បញ្ជាក់ថា ដោយមានការគិតគូរពីសុខទុក្ខបងប្អូនជនភៀសសឹក មានចាស់ ក្មេង ស្ត្រីមានផ្ទៃពោះ ជាពិសេសមុនរដូវភ្លៀងចូលមកដល់ ដែលពិបាកដល់ការរស់នៅរបស់ជនភៀសសឹក រាជរដ្ឋាភិបាលកម្ពុជា និងគណៈកម្មាធិការអន្តរក្រសួង បានសម្រេចរៀបចំជាជម្រកបណ្តោះអាសន្នជូនពួកគាត់ដែលមានផ្ទៃដីទំហំ ២០គុណ៣០ម៉ែត្រ សាងសង់ផ្ទះមួយខ្នង ដើម្បីឱ្យពួកគាត់រស់នៅស្រួល មានទាំងបន្ទប់ទឹក ព្រមទាំងមានការរៀបចំហេដ្ឋា រចនាសម្ព័ន្ធ មានភ្លើង អណ្តូងទឹកជាដើម។
ឯកឧត្ដម បន្តថា នៅពេលដែលព្រំដែនត្រូវបានដោះស្រាយចប់រួចរាល់ នៅពេលណាមួយ បងប្អូនជនភៀសសឹកអាចវិលត្រលប់ទៅភូមិឋានវិញ ហើយដីផ្ទះទាំងនេះនឹងត្រូវប្រគល់ជូនរាជរដ្ឋាភិបាល ហើយក្នុងនាមសមាគមអតីតយុទ្ធជន និងស្នើសុំរដ្ឋាភិបាល សម្រាប់ជូនដល់បងប្អូនអតីតយុទ្ធរស់នៅបន្ត ។ សម្រាប់ការសាងសង់ជម្រកបណ្តោះអាសន្ននេះ ឯកឧត្ដម ក៏ដូចជារដ្ឋបាលខេត្ត នឹងខិតខំជំរុញសំដៅធ្វើយ៉ាងឱ្យការសាងសង់នេះឆាប់បានរួចរាល់មុនរដូវវស្សា ឈានចូលមកដល់។ ហើយក្នុងនាមរាជរដ្ឋាភិបាល ក៏ដូចជាអាជ្ញាធរខេត្ត ថ្លែងអំណរគុណចំពោះឯកឧត្តម កែ គឹម យ៉ាន ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា និងជាតំណាងរាស្ត្រមណ្ឌលខេត្តបន្ទាយមានជ័យ និងលោកជំទាវ ដែលបានផ្តល់ដី៤០០ហិកតា សម្រាប់សាងសង់ជម្រកបណ្តោះអាសន្នជូនបងប្អូនជនភៀសសឹករស់នៅបណ្តោះអាសន្ន ដែលចំនួន៦ភូមិ ។ ក្នុងគ្រារដ៏លំបាកនេះដែររាជរដ្ឋាភិបាលកម្ពុជា និងធ្វើការដោះស្រាយជូនបងប្អូនភៀសសឹក ជាមូលនិធិសមធម៌ ដោះស្រាយការពិនិត្យព្យាបាលសុខភាពដោយមិនគិតថវិកា រួមទាំងដោះស្រាយប័ណ្ណសមធម៌ សម្រាប់ផ្តល់ជាថវិកាគាំពាសង្គមប្រចាំខែជូនបងប្អូនភៀសសឹកទាំង៦ភូមិខាងលើផងដែរ។ជាមួយគ្នានោះក្រសួងកសិកម្ម និងធ្វើការស្នើសុំដល់រាជរដ្ឋាភិបាល ធ្វើជាទីតាំងកសិកម្ម ដាំដុះដំណាំផ្សេងៗ ក៏ដូចជាផ្តល់ឱកាសដើម្បីឱ្យពួកគាត់មានប្រាក់ចំណូលប្រចាំថ្ងៃ តាមរយៈ ការដាំដុះដោយខ្លួនឯងជាដើម ហើយក៏ទទួលបានឱកាសការងារ ទទួលបានចំណូលសម្រាប់ផ្គត់ផ្គង់គ្រួសារ ៕
