(ប៉ៃលិន)៖សមត្ថកិច្ចចម្រុះចុះឆែរឆេរទីតាំងមួយចំនួនកាលពីថ្ងៃទី០៣ ខែកុម្ភះ ឆ្នាំ២០២៦ នៅតាមសណ្ឋាគារផ្ទះសំណាក់ កាស៊ីណូ ដែលស្ថិតនៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន។
សមត្ថកិច្ចបានបញ្ជាក់ថា ក្រោយពីមានការណែនាំពីលោកជំទាវ បាន ស្រីមុំ អភិបាលខេត្តប៉ៃលិន បន្តជំរុញឱ្យកម្លាំងសមត្ថកិច្ច និងមន្ត្រីជំនាញ អាជ្ញាធរមូលដ្ឋាន ចុះអនុវត្តន៍អោយបានតឹងរឹងលើករណីបទល្មើសនានាមិនឱ្យកើតមានក្នុងមូលដ្ឋានជាដាច់ខាត។
លោកជំទាវអភិបាលខេត្ត បានជំរុញឱ្យកម្លាំងសមត្ថកិច្ច និងអាជ្ញាធរត្រូវអនុវត្តន៍ ការពង្រឹងការអនុវត្តច្បាប់ និងការបង្ក្រាប ឲ្យបានម៉ឺងម៉ាត់ ត្រូវតាមដាន និងស្រាវជ្រាវ ការកំណត់មុខសញ្ញា និងទីតាំង ដែលសង្ស័យថា មានការបង្កប់នូវល្បែងស៊ីសងអនឡាញ ឬការឆបោកតាមប្រព័ន្ធបច្ចេកវិទ្យា (Cybercrime)។ ហើយរាល់បទល្មើសអនឡាញ ដែលរកឃើញ ត្រូវចាត់វិធានការតាមផ្លូវច្បាប់ជាធរមាន ដោយមិនត្រូវមានការអន្តរាគមន៍ ឬយោគយល់ឡើយ ដើម្បីរក្សាសន្តិសុខ ក្នុងខេត្ត។
អភិបាលខេត្តបញ្ជាក់ថា ការចូលរួមពីអាជ្ញាធរមូលដ្ឋាន អាជ្ញាធរក្រុង ស្រុក ឃុំ/សង្កាត់ គឺជាភ្នែកច្រមុះដ៏សំខាន់ គឺត្រូវចុះពិនិត្យតាមដានទីតាំងជួលផ្ទះ សណ្ឋាគារ ឬកន្លែងអាជីវកម្មផ្សេងៗ ដែលអាចផ្តល់ជម្រកដល់ក្រុមឧក្រិដ្ឋជនអនឡាញ។
លោកជំទាវ បាន ស្រីមុំ អភិបាលខេត្តប៉ៃលិន ក៏បានណែនាំ ឱ្យមានការផ្សព្វផ្សាយ ដល់ប្រជាពលរដ្ឋក្នុងមូលដ្ឋាន កុំឱ្យចាញ់បោកការអូសទាញ តាមរយៈការងារដែលមានប្រាក់ខែខ្ពស់ខុសធម្មតា ឬការវិនិយោគតាមអនឡាញ ដែលគ្មានប្រភពច្បាស់លាស់។ ជាមួយគ្នានេះ ត្រូវលើកទឹកចិត្ត ឱ្យប្រជាពលរដ្ឋរាយការណ៍ជាបន្ទាន់ដល់សមត្ថកិច្ច ប្រសិនបើឃើញសកម្មភាពសង្ស័យណាមួយ នៅក្នុងសហគមន៍មូលដ្ឋាន៕
