(បន្ទាយមានជ័យ) មន្ទីរព័ត៌មានខេត្តបន្ទាយមានជ័យ បានបើកកិច្ចប្រជុំតម្រង់ទិសលើការងារព័ត៌មាន និងសាធារណៈមតិជូនដល់មន្ត្រី នៃមន្ទីរព័ត៌មានខេត្តបន្ទាយមានជ័យ ក្រោមអធិបតីភាពឯកឧត្តម ទេព អស្នារិទ្ធ អនុរដ្ឋលេខាធិការក្រសួងព័ត៌មាន និងជាអ្នកពាក្យក្រសួងព័ត៌មាន ឯកឧត្តម ពៅ ផនសំណាង អនុរដ្ឋលេខាធិការក្រសួងព័ត៌មាន ។កិច្ចប្រជុំនេះ បានធ្វើឡើងនៅសាលប្រជុំមន្ទីរព័ត៌មានខេត្តបន្ទាយមានជ័យ នារសៀលថ្ងៃទី១៥ ខែកក្កដា ឆ្នាំ២០២៦ ដោយមានការចូលរួមពីលោក លោកស្រី ប្រធាន-អនុប្រធានមន្ទីរ ប្រធាន.អនុប្រធានការិយាល័យ និងមន្ត្រីរាជការនៃមន្ទីរព័ត៌មានខេត្តបន្ទាយមានជ័យផងដែរ។
បន្ទាប់ពីលោក សេក សុខុម ប្រធានមន្ទីរព័ត៌មានខេត្តបន្ទាយមានជ័យ បានឡើងមានមតិស្វាគមន៍ និងរាយការណ៍អំពីវិស័យព័ត៌មានក្នុងបណ្តាញផ្សព្វផ្សាយព័ត៌មាននៅថ្នាក់ក្រុង ស្រុក និងឃុំ សង្កាត់ ក្នុងខេត្តបន្ទាយមានជ័យរួចមក។ឯឧត្តម ពៅ ផនសំណាង អនុរដ្ឋលេខាធិការក្រសួងព័ត៌មាន បានមានប្រសាសន៍លើកឡើងថា៖ អ្នកព័ត៌មាន មានតួនាទីគោលដៅយ៉ាងសំខាន់ពាក់ព័ន្ធ និងសារព័ត៌មានសាធារណៈមតិ ក្នុងការប្រមូល វិភាគ និងគ្រប់គ្រងព័ត៌មាន ព្រមទាំងតាមដានសាធារណមតិឱ្យបានទាន់ពេលវេលា និងមានប្រសិទ្ធភាព។ ជាពិសេសចូលរួមទប់ស្កាត់ និងលុបបំបាត់ការរីករាលដាលនៃព័ត៌មានមិនពិត(ព័ត៌មានក្លែងក្លាយ)ដែលជាអាវុធមួយដែលអាចបង្កផលប៉ះពាល់ដល់សង្គម សន្តិសុខ និងសណ្តាប់ធ្នាប់សាធារណៈ។
ទន្ទឹមជាមួយគ្នានោះឯកឧត្តម បានធ្វើការស្នើសុំដល់ថ្នាក់នាំ និងមន្ត្រីរាជការនៃមន្ទីរព័ត៌មានខេត្តបន្ទាយមានជ័យ ត្រូវចូលរួមសហការគ្នា ចាប់ដៃគ្នាដើម្បីបន្តទិសដៅការងារនៅថ្ងៃខាងមុខ ដែលប្រមុខរាជរដ្ឋាភិបាល ក៏ដូចជារដ្ឋមន្ត្រីនៃក្រសួងព័ត៌មានបានប្រគល់ជូន។ព្រមទាំងចូលរួមថែរក្សាឧបករណ៍ សម្ភារៈ បច្ចេកទេស ក្នុងការប្រើប្រាស់អោយបានគង់វង្សនិងយូរអង្វែង។
ថ្លែងក្នុងឱកាសនោះឯឧត្តម ទេព អស្នារិទ្ធ អនុរដ្ឋលេខាធិការក្រសួងព័ត៌មាន និងជាអ្នកពាក្យក្រសួងព័ត៌មាន បានពាំនាំនូវការផ្តាំផ្ញើសាកសួរសុខទុក្ខពីសំណាក់ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងបានកោតសរសើរចំពោះការខិតខំប្រឹងប្រែងរបស់មន្ទីរព័ត៌មានខេត្តបន្ទាយមានជ័យ ក្នុងការបំពេញតួនាទីជាសេនាធិការលើវិស័យព័ត៌មាន និងសាធារណមតិ ជាពិសេសការចងក្រងបណ្តាញផ្សព្វផ្សាយព័ត៌មាននៅថ្នាក់ក្រុង ស្រុក និងឃុំ សង្កាត់។
ឯឧត្តម អនុរដ្ឋលេខាធិការក្រសួងព័ត៌មាន និងជាអ្នកពាក្យក្រសួងព័ត៌មាន បានសង្កត់ធ្ងន់ថា៖ ក្នុងយុគសម័យឌីជីថល ព័ត៌មានក្លែងក្លាយបាន និងកំពុងរីករាលដាលយ៉ាងឆាប់រហ័ស ដែលទាមទារឱ្យមន្ត្រីព័ត៌មាន និងអ្នកសារព័ត៌មានទាំងអស់ បង្កើនការយកចិត្តទុកដាក់ខ្ពស់លើការផ្ទៀងផ្ទាត់ប្រភពព័ត៌មានឱ្យបានច្បាស់លាស់ មុននឹងធ្វើការផ្សព្វផ្សាយ។
ជាមួយគ្នានេះឯឧត្តម ទេព អស្នារិទ្ធ បានជំរុញឱ្យបន្តផ្សព្វផ្សាយយុទ្ធនាការប្រឆាំងព័ត៌មានក្លែងក្លាយឱ្យបានទូលំទូលាយដល់ប្រជាពលរដ្ឋគ្រប់ស្រទាប់ ដើម្បីរួមចំណែកបង្កើតខែលការពារសុវត្ថិភាពព័ត៌មាន និងកសាងសង្គមមួយដែលមានទំនួលខុសត្រូវក្នុងការប្រើប្រាស់ព័ត៌មាន៕
