(បន្ទាយមានជ័យ) ដោយមានការគាំទ្រយ៉ាងខ្លាំងក្លាពីសំណាក់មាតាបិតា អាណាព្យាបាល សិស្ស សាលាទំនើបអន្តរជាតិ បានពង្រីកទីតាំងបន្ថែមនៅក្នុងទឹកដីខេត្តបន្ទាយមានជ័យ នៅព្រឹកថ្ងៃសៅរ៍ ទី១១ ខែកក្កដា ឆ្នាំ២០២៦នេះ បានរៀបចំពិធីសម្ពោធសាលាទំនើបអន្តរជាតិ សាខាខេត្តបន្ទាយមានជ័យ ក្រោមអធិបតីភាពលោក យឹម សំណាង អភិបាលរង នៃគណអភិបាលខេត្តបន្ទាយមានជ័យ។ បិធីនេះបានធ្វើឡើងនៅផ្លូវលេខ២(អតីតផ្ទះសំណាក់ បញ្ញា) ស្ថិតនៅក្នុងភូមិសូភី សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ដោយមានការអញ្ជើញចូលរួមពីលោក ស្រេង សុផល អភិបាលក្រុងសិរីសោភ័ណ លោក ចាន់ សុភាព អនុប្រធានមន្ទីរអប់រំ យុវជន និងកីឡាខេត្ត លោក រស់ សាវីតធី សហស្ថាបនិក និងជានាយកប្រតិបត្តិនៃសាលាទំនើបអន្តរជាតិ និងលោក ព្រំ បញ្ញា ស្ថាបនិក និងជាប្រធានក្រុមព្រឹក្សាភិបាល នៃសាលាទំនើបអន្តរជាតិ ព្រមទាំងអាជ្ញាធរមូលដ្ឋានភូមិ សង្កាត់ សិស្សានុសិស្ស និងអាណាព្យាបាលសិស្សផងដែរ។
លោក រស់ សាវីតធី សហស្ថាបនិក និងជានាយកប្រតិបត្តិនៃសាលាទំនើបអន្តរជាតិ បានមានមតិលើកឡើងថា៖ បច្ចុប្បន្នក្នុងឆ្នាំសិក្សា២០២៥.២០២៦ សាលាទំនើបអន្តរជាតិ មានសាខាចំនួម១០ និងមានសិស្សចំនួន ៣៧០០នាក់ និងមានបុគ្គលិកបង្រៀន និងមិនបង្រៀនចំនួន ៤០១នាក់។ ជាក់ស្ដែង ដើម្បីឆ្លើយតបទៅនឹងសន្ទុះកំណើននៃការគាំទ្រយ៉ាងខ្លាំងក្លាពីសំណាក់មាតាបិតា អាណាព្យាបាល មកកាន់សាលាទំនើបអន្តរជាតិ ក្នុងឆ្នាំសិក្សាថ្មី២០២៦.២០២៧ បានកំពុងពង្រីកទីតាំងបន្ថែមដល់ទៅ ៣សាខា ថែមទៀតដែលមានទីតាំងរួមមាន៖១,សាលាទំនើបអន្តរជាតិ សាខាព្រែកលៀប(ដែលមានទីតាំងនៅភ្នំពេញ)។ ២,សាលាទំនើបអន្តរជាតិ សាខាចំការដូង(ដែលមានទីតាំងនៅភ្នំពេញ)។ ៣,សាលាទំនើបអន្តរជាតិ សាខាខេត្តបន្ទាយមានជ័យ(ដែលមានទីតាំងស្ថិតនៅផ្លូវលេខ២(អតីតផ្ទះសំណាក់ បញ្ញា)ក្រុងសិរីសោភ័ណ។ដូច្នេះហើយសាលាទំនើបអន្តរជាតិ មានសាខាសរុបចំនួន ១៣សាខា។
ទន្ទឹមជាមួយគ្នានោះលោក រស់ សាវីតធី បានបញ្ជាក់ថា៖ សាលាទំនើបអន្តរជាតិ ទទួលសិស្សឲ្យចូលរៀន ពីមត្តេយ្យកម្រិតទាបដែលមានអាយុចាប់ពី ៣ឆ្នាំឡើង រហូតដល់ថ្នាក់ទី១២ ទូទាំងប្រទេស ដោយផ្ដល់កម្មវិធីសិក្សាពេញមួយថ្ងៃនៅសាលា ពោលគឺកម្មវិធីជាតិមួយវេនមាន៤ម៉ោង និងកម្មវិធីសិក្សាទំនើបមួយវេនមាន៤ម៉ោង និងសិក្សា៥ថ្ងៃ ក្នុងមួយសប្តាហ៍ ពីថ្ងៃច័ន្ទ ដល់ថ្ងៃសុក្រ។ក្នុងនោះកម្មវិធីសិក្សាទំនើបរួមមានមុខវិជ្ជាសំខាន់ៗចំនួន ៩រួមមាន៖ ១,ភាសាអង់គ្លេស ២,ភាសាចិន ៣,កុំព្យូទ័រ ៤,គណិតវិទ្យាជាភាសាអង់គ្លេស ៥,វិទ្យាសាស្ត្រជាភាសាអង់គ្លេស ៦,រ៉ូបូសុីង រ៉ូបូទិក និងថេចបត់ មុខវិជ្ជាបែបស្ទែម(robo thing robotic and kechbot) ៧,វេយ្យាករណ៍អង់គ្លេស ៨,គំនូរ និងទី៩,អប់រំកាយ និងកីឡា។
ថ្លែងនៅក្នុងឱកាសនោះលោក យឹម សំណាង អភិបាលរងខេត្តបានធ្វើការកោតសរសើរ និងសាទរចំពោះចំពោះវត្តមានរបស់សាលាទំនើបអន្តរជាតិ ដែលបានបង្ហាញវត្តមាននៅក្នុងខេត្តបន្ទាយមានជ័យនាពេលនេះ ក្នុងគោលដៅបណ្ដុះបណ្ដាលធនធានមនុស្ស(ទំពាំងស្នងឬស្សី) ផ្ដោតទៅលើវិស័យអប់រំ។
លោក អភិបាលរងខេត្តបានបញ្ជាក់ថា៖ ទាំងអស់នេះគឺជាការរួមចំណែកមួយជាថ្នាល់បណ្តុះបណ្តាលធនធានមនុស្ស ហើយសាលាទំនើបអន្តរជាតិ ជាគ្រឹះស្ថានឯកជនមានចក្ខុវិស័យ និងបេសកកម្មបណ្ដុះបណ្ដាលធនធានមនុស្សប្រកបដោយចតុស្តម្ភអប់រំ។ជាពិសេសការអប់រំនេះគឺជាគោលដៅ១ក្នុងចំណោមយុទ្ធសាស្ត្របញ្ចកោណរបស់រាជរដ្ឋាភិបាលនិតីកាលទី៧នេះផងដែរ៕
