បន្ទាយមានជ័យ ៖ ឯកឧត្ដម ប្លែក វ៉ារី ប្រធាន ក្រុមប្រឹក្សា ខេត្ត ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ អញ្ជើញជាអធិបតីភាពក្នុងពិធីសម្ពោធដាក់ឱ្យប្រើប្រាស់ជាផ្លូវការ “អគារមជ្ឈមណ្ឌលសិក្សាពេញមួយជីវិត” នៅជប់វារី ស្រុកព្រះនេត្រព្រះ ជាជំនួយរបស់អង្គការ កុមារឥតព្រំដែន ប្រចាំកម្ពុជា KNK ។ ពិធីនេះបានធ្វើឡើងនារសៀលថ្ងៃទី២៨ ខែឧសភា ឆ្នាំ ២០២៦ នៅបរិវេណការិយាល័យអប់រំស្រុកព្រះនេត្រព្រះ ដោយមានការចូលរួមពី ឯកឧត្តមបណ្ឌិត ឌី សមស៊ីដេត អគ្គនាយករង នៃអគ្គនាយកដ្ឋានអប់រំ និងជាប្រធានគណៈ គ្រប់គ្រង នាយកដ្ឋានអប់រំក្រៅប្រព័ន្ធ និងបរិយាបន្ន លោក យ៉ូនីសាវ៉ា អាតសុស៊ី (Mr. ATSUSHI YONEZAWA) ប្រធានការិយាល័យកុងស៊ុលជប៉ុនប្រចាំកម្ពុជា លោក ស្រី សាកាន (Mr. Srey Sakan) នាយក អង្គការកុមារឥតព្រំដែន ប្រចាំកម្ពុជា និងសហការីលោកប្រធាននាយកដ្ឋានអប់រំក្រៅប្រព័ន្ធ មន្ទីរ អង្គភាព ពាក់ព័ន្ធ គណៈអភិបាលស្រុក ក្រុមប្រឹក្សាស្រុក សិស្សានុសិស្ស យុវជន យ៉ាងច្រើនកុះករផងដែរ ។
លោក ស្រី សាកាន នាយកអង្គការកុមារឥតព្រំដែន ប្រចាំកម្ពុជា ក៏បានថ្លែងអំណរគុណយ៉ាងជ្រាលជ្រៅចំពោះ ក្រសួងការបរទេសជប៉ុន តាមរយៈស្ថានទូត ប្រចាំកម្ពុជា ដែលបានផ្តល់ថវិកាគាំទ្រដល់កម្មវិធី កសាងសម្ថតភាពយុវជនបោះបង់ការសិក្សាក្នុងខេត្តបន្ទាយមានជ័យ ដោយពង្រឹងមជ្ឈមណ្ឌលសិក្សាពេញមួយជីវិត តាមរយៈអង្គការកុមារឥតព្រំដែនអន្តរជាតិ។
លោក យ៉ូនីសាវ៉ា អាតសុស៊ី (Mr. ATSUSHI YONEZAWA) ប្រធានការិយាល័យកុងស៊ុលជប៉ុនប្រចាំកម្ពុជា បានចូលរួមរំលែកទុក្ខយ៉ាងក្រៀមក្រំ ចំពោះប្រជាពលរដ្ឋ ដែលបានរងគ្រោះពីបញ្ហាជម្លោះព្រំដែននៅឆ្នាំមុន។ ដោយប្រទេសជប៉ុនសង្ឃឹមយ៉ាងមុតមាំថា បញ្ហាព្រំដែននេះ នឹងត្រូវបានដោះស្រាយដោយសន្តិវិធី។ ហើយប្រទេសជប៉ុន ក៏បន្តប្តេជ្ញាផ្តល់ការគាំទ្រក្នុងទម្រង់ផ្សេងៗ ដើម្បីជួយបន្ធូរភាពតានតឹង និងជួយដល់ប្រជាជនដែលរងផលប៉ះពាល់។ ជាមួយគ្នានោះលោក យ៉ូនីសាវ៉ា អាតសុស៊ី ក៏បានចូលរួមអបអរសាទរ ការបញ្ចប់ការសាងសង់មជ្ឈមណ្ឌលសិក្សាពេញមួយជីវិតនៅស្រុកព្រះនេត្រព្រះ។ លោកថា មជ្ឈមណ្ឌលនេះ នឹងផ្តល់ឱកាសអប់រំ និងបណ្តុះបណ្តាលវិជ្ជាជីវៈ ដល់យុវជន ដែលនឹង បំពេញតួនាទីយ៉ាងសំខាន់ សម្រាប់អនាគតរបស់ប្រទេសកម្ពុជា។
ឯកឧត្ដម អ៊ុំ រាត្រី អភិបាល នៃគណៈអភិបាលខេត្ត មានប្រសាសន៍ ថា អគារដែលកំពុងដាក់សម្ពោធនាពេលនេះ គឺជាសមិទ្ធផលថ្មីមួយបន្ថែមទៀត ដែលជាជំនួយឧបត្ថម្ភដ៏ថ្លៃថ្លារបស់អង្គការកុមារឥតព្រំដែនប្រចាំកម្ពុជា ដែលបានជួយគាំទ្រដល់វិស័យសិក្សាធិការនៅក្នុងខេត្តបន្ទាយមានជ័យ ហើយក៏ជាការចូលរួមចំណែកដ៏សំខាន់ក្នុងការជួយអភិវឌ្ឍន៍ដល់ វិស័យអប់រំ ឱ្យកាន់តែមានភាពល្អប្រសើរក្នុងស្ថានភាពដែលខេត្ត មានបញ្ហាប្រឈមពីការឈ្លានពានរបស់ប្រទេសថៃ។ ឯកឧត្ដម ក៏បានចូលរួមអបអរសាទរ និងបង្ហាញពីមោទនភាពជាមួយថ្នាក់ដឹកនាំក្រសួងអប់រំ មន្ទីរអប់រំ យុវជន និងកីឡាខេត្ត រដ្ឋបាលស្រុកព្រះនេត្រព្រះ ជាពិសេសការិយាល័យអប់រំស្រុកព្រះនេតព្រះ ក៏ដូចជាបងប្អូនប្រជាពលរដ្ឋ អាជ្ញាធរ មូលដ្ឋាន លោកគ្រូ អ្នកគ្រូ សិស្សានុសិស្ស ចំពោះសមិទ្ធផលអគារមជ្ឈមណ្ឌលសិក្សាពេញមួយជីវិត ដែលជាផ្នែកមួយជួយឱ្យការងារបម្រើសេវាអប់រំសិក្សាបានកាន់តែងាយស្រួល មានភាពកក់ក្តៅ ឆ្លើយតបនឹងតម្រូវការរបស់មូលដ្ឋានស្របតាមយុទ្ធសាស្ត្របញ្ចកោណ–ដំណាក់កាលទី១ និងកម្មវិធីគោលនយោបាយជាអាទិភាពរបស់រាជរដ្ឋាភិបាល ក្រោមការដឹកនាំដ៏ឈ្លាសវៃប្រកបដោយគតិបណ្ឌិត សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា ដែលតែងតែគិតគូ និងយកចិត្តទុកដាក់ខ្ពស់លើវិស័យអប់រំ ដែលជាបញ្ហាអាទិភាពជាពិសេស សេវាសាធារណៈនៅថ្នាក់ក្រោមជាតិ។
ឯកឧត្ដម អភិបាល ខេត្ត ក៏បានបញ្ជាក់ថា ការសិក្សានៅមជ្ឈមណ្ឌលសិក្សាពេញមួយជីវិត មិនមែនមានតែការទទួលបានចំណេះដឹង និងជំនាញបច្ចេកទេស ប៉ុណ្ណោះទេ គឺតាមរយៈការសិក្សា និងការរស់នៅជាក្រុមជាមួយមិត្តភក្តិ សិស្សានុសិស្ស ក៏អាចអភិវឌ្ឍជំនាញប្រាស្រ័យទាក់ទង រួមទាំងវិធីកសាងទំនាក់ទំនងល្អ នៅកន្លែងការងារ ការរៀនសូត្រ ការដកបទពិសោធន៍ និងការរាប់អានមិត្តភក្តិនៅទីនេះ នឹងក្លាយជាទ្រព្យសម្បត្តិ ដ៏មានតម្លៃ ក្នុងជីវិតរបស់សិស្សានុសិស្សទាំងអស់គ្នា។
បើតាមការបញ្ជាក់ពីលោក ហឿន វិរៈ អភិបាល ស្រុកព្រះនេត្រព្រះ ឱ្យដឹងថា អាគារមជ្ឈមណ្ឌលសិក្សាពេញមួយជីវិត ឃុំជប់វារី ចាប់ផ្តេីមសាងសង់នៅថ្ងៃទី១៣ ខែមិថុនា ឆ្នាំ២០២៥ និងបញ្ចប់នៅថ្ងៃទី១៣ ខែវិច្ឆិកា ឆ្នាំ២០២៥ មានទំហំ ១២ម៉ែត្រ គុណ ១៦ម៉ែត្រ មានចំនួន៣បន្ទប់ និងមានបន្ទប់ទឹកប្រុសចំនួន១ បន្ទប់ទឹកស្រីចំនួន១ “ចំណាយថវិកាសរុប ៧៦,៩៩៩.៦៨ដុល្លារ។ ក្នុងអគារត្រូវបានបំពាក់សម្ភារៈការិយាល័យ នឹង សម្ភារៈបម្រើឱ្យការសិក្សានាញរួមមានជំនាញជួសជុលម៉ាស៊ីន ត្រជាក់ ជំនាញសំអាងការ កុំព្យូទ័រ និងថ្នាក់សិក្សាកម្រិតមូលដ្ឋាន៕
