បន្ទាយមានជ័យ ៖ នាព្រឹកថ្ងៃទី២១ ខែឧសភា ឆ្នាំ២០២៦ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តបន្ទាយមានជ័យ បានរៀបចំសិក្ខាសាលា ផ្សព្វផ្សាយផែនការប្រើប្រាស់ដីឃុំ សង្កាត់ ទូទាំងខេត្តបន្ទាយមានជ័យ ។ពិធីនេះបានប្រព្រឹត្តទៅនៅសាលប្រជុំ ធំ សាលាខេត្តបន្ទាយមានជ័យ ក្រោមអធិបតីភាពលោក លៀម សុដា អភិបាលរង នៃគណៈ អភិបាលខេត្ត តំណាងដ៏ខ្ពង់ខ្ពស់ឯកឧត្តម អ៊ុំ រាត្រី អភិបាល នៃគណៈអភិបាលខេត្ត ព្រមទាំងមានការចូលរួមពីសមាជិកក្រុមប្រឹក្សាខេត្ត អភិបាលរង លោកបណ្ឌិត ហោ សាណារ៉ា ព្រឹទ្ធបុរសនៃមហាវិទ្យាល័យរៀបចំដែនដី និងរដ្ឋបាលដីធ្លី ប្រធាន–អនុប្រធានមន្ទីរជំនាញ និងអង្គភាពពាក់ព័ន្ធជុំវិញខេត្ត ប្រមាណជាង៨០០នាក់ ផងដែរ។
លោក មាស ដារ៉ា ប្រធានមន្ទីររៀបចំដែនដី បានបញ្ជាក់ថា ខេត្តបន្ទាយមានជ័យ បានបញ្ចប់ការវាស់វែងដីធ្លីមានលក្ខណៈប្រព័ន្ធ និងបានធ្វើកម្មវិធីប្រកាសបិទបញ្ចប់ការងារវាស់វែង ដីធ្លីនៅថ្ងៃទី៣០ ខែមិថុនា ឆ្នាំ២០២៥ ជាដំបូងក្បាលដីប៉ាន់ស្មាន មានចំនួន ៦៧៨៦៦៧ក្បាលដី ប៉ុន្តែក្រោយពីយុទ្ធនាការចុះវាស់វែងបង្ហើយរួចមកមានក្បាលដីចំនួន ៧៥២១៨១ក្បាលដី លើសពីការប៉ាន់ស្មានចំនួន ៧៣៥១៤ក្បាលដី។ រហូតមកដល់ពេលនេះក្រុមការងារចុះបញ្ជីដីធ្លីមាន លក្ខណៈជាប្រព័ន្ធចំនួន ៧ក្រុង–ស្រុក បានបញ្ចប់ការងារប្រមូលទិន្នន័យ និងនៅសល់ចំនួន២ក្រុង–ស្រុកទៀតនឹងបញ្ចប់ការងារនៅចុងខែឧសភា ឆ្នាំ២០២៦ ចំពោះការបញ្ចូលទិន្នន័យដែលនៅសល់ប្រមាណ ជិត១០ម៉ឺនក្បាលដីទៀត នឹងបញ្ចប់នៅចុងខែកក្កដា ឆ្នាំ២០២៦ និងចេញវិញ្ញាបនបត្រសម្គាល់ម្ចាស់ អចលនវត្ថុ(ប្លង់រឹង) ជូនបងប្អូនប្រជាពលរដ្ឋយ៉ាងយូរចុងឆ្នាំ២០២៧។
បន្ទាប់ពីស្តាប់របាយការណ៍សង្ខេប របស់មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត លោក លៀម សុដា បញ្ជាក់ថា ខេត្តបន្ទាយមានជ័យបានរៀបចំផែនការប្រើប្រាស់ដីថ្នាក់ខេត្ត ប្លង់គោលប្រើប្រាស់ដី ក្រុងសិរីសោភ័ណ និងផែនការប្រើប្រាស់ដី និងប្លង់គោលប្រើប្រាស់ដីក្រុងប៉ោយប៉ែតរួចរាល់ ដោយរង់ចាំប្រជុំពិនិត្យ និងអនុម័តពីគណៈកម្មាធិការរៀបចំដែនដី និងនគរូបនីយកម្មថ្នាក់ជាតិ។ មិនតែប៉ុណ្ណោះមន្ទីរបានរៀបចំកសាងផែនការប្រើប្រាស់ដីឃុំសម្រេចបានចំនួន ៨ឃុំ និងបានអនុម័តចំនួន ២ឃុំ បន្ថែម កាលពីថ្ងៃទី១៨ ខែខុសភា ឆ្នាំ២០២៦។
លោកអភិបាលរង ខេត្ត បន្តថា គោលនយោបាយរបស់រាជរដ្ឋាភិបាល ក្នុងនីតិកាលទី៧ ដែលដឹកនាំដោយសម្តេចបវរធិបតី ហ៊ុន ម៉ាណែត បានដាក់ចេញនូវយុទ្ធសាស្ត្រ បញ្ចកោណដំណាក់កាលទី១ ក្នុងនោះមុំទី៤ ដែលនិយាយអំពីការពង្រឹងការគ្រប់គ្រង និងការធ្វើទំនើបកម្ម នគរូបនីយកម្ម ដែលជាគោលដៅយុទ្ធសាស្ត្រគឺការពង្រីកទីក្រុង និងការអភិវឌ្ឍទីក្រុងថ្មីៗបន្ថែមទៀតនៅតាមបណ្តារាជធានី–ខេត្ត ការបង្កើតសួនសាធារណៈ និងឧទ្យានបៃតង និងការពង្រឹងការគ្រប់គ្រង និងការធ្វើទំនើបកម្មនគរូបនីយកម្ម ដើម្បីធានាសុវត្ថិភាព សោភ័ណភាព បរិស្ថានល្អ និងសុខមាលភាពសម្រាប់ការរស់នៅ និងប្រសិទ្ធភាពក្នុងការអភិវឌ្ឍសង្គម–សេដ្ឋកិច្ច។ ហើយក្នុងនាមរដ្ឋបាលខេត្តបន្ទាយមានជ័យ គាំទ្រ និងប្តេជ្ញាជំរុញអនុវត្តនូវយុទ្ធសាស្ត្រនេះ ឱ្យមានប្រសិទ្ធភាព។ លោក លៀម សុដា ក៏បានបញ្ជាក់ទៅកាន់អាជ្ញាធរមូលដ្ឋាន ជាពិសេស គឺរដ្ឋបាលឃុំ–សង្កាត់ ផ្ទាល់តែម្តង ទាក់ទងនឹងការកសាងផែនការប្រើប្រាស់ ដីឃុំ–សង្កាត់នេះ គឺរដ្ឋបាលឃុំ–សង្កាត់ ត្រូវតែលើកគម្រោងអភិវឌ្ឍន៍ និងកំណត់ចក្ខុវិស័យ របស់ខ្លួនឱ្យបាន ច្បាស់លាស់។
លោក អ៊ុ វិណារ៉ា អនុប្រធានមន្ទីរ ក៏បទបង្ហាញស្តីពីលិខិតបទដ្ឋានគតិយុត្តគាំទ្រការងាររៀបចំ ផែនការប្រើប្រាស់ដីថ្នាក់ឃុំ–សង្កាត់។ ដោយបច្ចុប្បន្នការកសាងផែនការប្រើប្រាស់ឃុំ សង្កាត់ ក្នុងភូមិសាស្ត្រខេត្តបន្ទាយមានជ័យ បាន សម្រេចបានលទ្ធផលមួយចំនួន។ ព្រមរួមទាំងបានបើកឱកាសដល់គ្រប់ភាគីពាក់ព័ន្ធដែលចូលរួមមានការលើកឡើងជាសំណួរចម្លើយដើម្បីឱ្យការប្រើប្រាស់ដីប្រកបដោយប្រសិទ្ធភាព៕
