(បន្ទាយមានជ័យ)៖កាលពីរសៀលថ្ងៃទី២១ ខែមេសាឆ្នាំ២០២៦ ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ អមដំណើរដោយលោក ឃ្លោក នួយ អភិបាលរង ខេត្ត បានអញ្ជើញចុះពិនិត្យនៃការសាងសង់ហេដ្ឋារចនាសម្ព័ន្ធនានា នឹងចុះជួបសំណេះសំណាលជាមួយលោកគ្រូ–អ្នកគ្រូ និងប្អូនៗ ក្មួយៗសិស្សានុសិស្សដែលកំពុងសិក្សារៀនសូត្រ នៅមណ្ឌលជនភៀសសឹក នៃផ្ទះបៃតង ស្ថិតនៅក្នុងភូមិស្លក្រាម ឃុំស្លក្រាម ស្រុកស្វាយចេក ខេត្តបន្ទាយមានជ័យ។ បើតាមការឲ្យដឹងពីលោកគ្រូ–អ្នកគ្រូ គណៈគ្រប់គ្រងសាលាបានបញ្ជាក់ថា សាលារៀនទើបនឹងបង្កើតថ្មីបានចំនួន ២ខ្នងរួចហើយ នឹងបើកបវេសនាកាលថ្មីឲ្យសិស្សានុសិស្សបានចូលសិក្សារៀនសូត្រជាបន្តបន្ទាប់ចាប់ពីថ្នាក់មតេយ្យដល់ថ្នាក់វិទ្យាល័យ។
ឯកឧត្តម អ៊ុំ រាត្រី បានធ្វើការកោតសរសើរដោយស្មោះចំពោះគណៈគ្រប់គ្រងសាលា ដែលបានពុះពារគ្រប់ឧបសគ្គក្នុងការបង្ហាត់បង្រៀនដោយការយកចិត្តទុកដាក់ ដើម្បីបង្កើននូវធនធានមនុស្សហើយចំពោះ សិស្សានុសិស្សពួកគាត់មិនបានបាក់ទឹកចិត្តនោះឡើយ ហើយនៅតែខិតខំសិក្សារៀនសូត្រជាបន្តបន្ទាប់ដើម្បីបានចំណេះជំនាញ ដើម្បី បម្រើប្រយោជន៍ខ្លួនគ្រួសារនិងសង្គមជាតិ។
ក្នុងនាមរដ្ឋបាលខេត្តបន្ទាយមានជ័យនិងក្នុងនាមអភិបាលខេត្ត ក៏ដូចជាបងប្អូនប្រជាពលរដ្ឋទូទាំងខេត្ត សូមប្រកាសគាំទ្រយ៉ាងពេញទំហឹងចំពោះចំណាត់ការដ៏ម៉ឺងម៉ាត់ប្រកបដោយយុទ្ធសាស្ត្រច្បាស់លាស់ ត្រឹមត្រូវរបស់សម្តេចមហាបវរធិបតី ហ៊ុនម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការដោះស្រាយបញ្ហាព្រំដែន រវាងប្រទេសកម្ពុជា–ថៃ ដោយប្រើយន្តការតាមសន្តិវិធីតាមច្បាប់ មិនយកសង្គ្រាម គឺត្រូវការសន្តិភាពនិងកសាងព្រំដែន មិត្តភាពសន្តិភាព សហប្រតិបត្តិការអភិវឌ្ឍន៍ ដែលជាឧត្តមប្រយោជន៍ សម្រាប់ប្រជាជនទាំងពីរ ហើយក៏សូមអំពាវនាវដល់បងប្អូនប្រជាពលរដ្ឋខ្មែរគ្រប់និន្នាការទាំងអស់ សូមមេត្តាជឿជាក់និងទុកចិត្តលើរាជរដ្ឋាភិបាលក្នុងការការពារអធិបតេយ្យភាពនិងបូរណភាពទឹកដី។ ក្នុងនោះឯកឧត្តម អភិបាលខេត្ត ក៏បានធ្វើការណែនាំបន្ថែមទៅដល់កូនៗ ក្មួយៗសិស្សានុសិស្ស ត្រូវចូលរួមគោរពច្បាប់ចរាចរណ៍ ជាពិសេសត្រូវចៀសឱ្យឆ្ងាយអំពីគ្រឿងញៀន៕
