ខេត្តកំពង់ធំ៖យ៉ាងហោចណាស់មានមនុស្សចំនួន ៥នាក់បានស្លាប់ និងរងរបួស ត្រូវបានដឹកយកទៅសង្គ្រោះនៅឯមន្ទីរពេទ្យភ្លាមៗ ក្នុងហេតុការណ៍គ្រោះថ្នាក់ចរាចរណ៍ដ៏រន្ធត់មួយ រវាងរថយន្តធុនធំរ៉េចង្កូតបុករះអ្នកថ្មើជើងទាំងកំរោល នាវេម៉ោង៨ និង៣០នាទីព្រឹក ថ្ងៃទី២៩ ខែមីនា ឆ្នាំ២០២៦ ស្ថិតក្នុងភូមិជាយស្បៃ ឃុំកកោះ ស្រុកសន្ទុក ខេត្តកំពង់ធំ ។
សមត្ថកិច្ចបានឲ្យដឹងថា ករណីនេះបង្កឡើងដោយរថយន្តម៉ាក ហ៊ីយ៉ាន់ដាយ (Hyundai) ពណ៌ស លាយខៀវ ពាក់ស្លាកលេខ ភ្នំពេញ 3E-2070 បើកបរដោយឈ្មោះ វេង គ្រឹស្នា ភេទប្រុស អាយុ ៣០ឆ្នាំ មានទីលំនៅភូមិប៉ាលហាល សង្កាត់ប៉ាលហាល ក្រុងព្រះវិហារ ខេត្តព្រះវិហារ ធ្វើដំណើរក្នុងទិសដៅពីជើងទៅត្បូង លុះមកដល់ចំណុចកើតហេតុ ក៏បានរ៉េចង្កូតទៅខាងឆ្វេង បុកអ្នកថ្មើរជើងពេញទំហឹងតែម្តង បណ្តាលឲ្យមានអ្នកស្លាប់នៅកន្លែងកើតហេតុភ្លាមៗចំនួន៤នាក់ និង ១នាក់ទៀតស្លាប់ ក្រោយពេលបញ្ជូនទៅសង្គ្រោះនៅមន្ទីរពេទ្យ។
សមត្ថកិច្ចបញ្ជាក់ថា ជនរងគ្រោះដែលបានបាត់បង់ជីវិតក្នុងហេតុការណ៍នេះ រួមមាន៖ ១ .ឈ្មោះ សៀង ខាន់ ភេទស្រី អាយុ ៦៥ ឆ្នាំ (ស្លាប់នៅកន្លែង) ,២. ឈ្មោះ ធឿន ចាន់នី ភេទស្រី អាយុ ១០ ឆ្នាំ (ស្លាប់នៅកន្លែង) , ៣. ឈ្មោះ ធឿន ស្រីខួច ភេទស្រី អាយុ ១២ ឆ្នាំ (ស្លាប់នៅកន្លែង) , ៤. ឈ្មោះ គង់ គី ភេទស្រី អាយុ ៧៣ ឆ្នាំ (ស្លាប់នៅកន្លែង) , និងទី៥. ឈ្មោះ ជា សុខហេង ភេទស្រី អាយុ ៨ ឆ្នាំ (រងរបួសធ្ងន់ និងបានស្លាប់បាត់បង់ជីវិតពេលបញ្ជូនទៅដល់មន្ទីរពេទ្យ) ។ ជនរងគ្រោះទាំងអស់មានទីលំនៅភូមិជាយស្បៃ ឃុំកកោះ ស្រុកសន្ទុក ខេត្តកំពង់ធំ។ បច្ចុប្បន្នសាកសព ត្រូវបានក្រុមគ្រួសារយកទៅរៀបចំធ្វើបុណ្យតាមប្រពៃណី ខណៈដែលសមត្ថកិច្ចកំពុងបន្តនីតិវិធីចំពោះអ្នកបើកបរ និងមធ្យោបាយបង្កហេតុ៕
